Aldın xabar bergenimizdey, búgin, 24-iyun kúni Berdaq atındaǵı Qaraqalpaq mámleketlik universitetinde respublikamızdaǵı barlıq joqarı oqıw orınlarınıń student-jasları qatnasıwında «Bir Watan, bir xalıq bolıp, jańa ómir hám keleshek jaratamız!» súreni tiykarında «Talaba FEST» festivalı bolıp ótti.

Festivaldıń ashılıw máresimine Ózbekstan Respublikası Joqarı bilimlendiriw, ilim hám innovaciyalar ministrliginiń juwaplı xızmetkeri D.Nuriddinov, ministrliktiń innovaciyalar ofisi juwaplı xızmetkeri A.Niyazov, Respublikalıq Ruwxıylıq hám aǵartıwshılıq orayı Qaraqalpaqstan Respublikası bóliminiń baslıǵı T.Atamuratov, joqarı oqıw orınlarınıń juwapkerleri jáne student-jaslar qatnastı.

Ilaj qatnasıwshıları student-jaslardıń innovaciyalıq ideyaları hám joybarlarınan ibarat «Robototexnika», sonday-aq, milliy taǵamlardan dúzilgen «Eń mazalı taǵamlar» kórgizbeleri menen tanıstı.