Usı jıldıń 26-28-iyun kúnleri Berdaq atındaǵı Qaraqalpaq mámleketlik universitetinde «Techstars Startup Weekend Nukus» ideatonı shólkemlestirildi.

Jaslardıń innovaciyalıq ideyaları hám startap baslamaların qollap-quwatlaw, olarda isbilermenlik, komandada islew hám mashqalalardı zamanagóy usıllar járdeminde sheshiw kónlikpelerin rawajlandırıw maqsetinde ótkerilgen ilajǵa Ájiniyaz atındaǵı Nókis mámleketlik pedagogikalıq institutınıń bir topar belsendi studentleri de qatnastı.

Ideaton juwmaǵında institut studentlerinen Zilola Allakova, Alfiya Amangeldieva hám Aliya Abdigalievalar tárepinen islep shıǵılǵan «Clipper» joybarı tóreshiler quramı tárepinen sıylı 3-orınǵa ılayıq dep tabıldı. Solay etip, institut studentleri 5 million sum jeńimpazı boldı.

Ideaton dawamında qatnasıwshılar ekspertler hám mentorlar járdeminde óz ideyaların jetilistirip, bazardı analizlew, biznes-model dúziw, innovaciyalıq sheshimler islep shıǵıw hám investorlardı qızıqtırıw boyınsha ámeliy bilimlerdi ózlestirdi.

Institut rektorı w.a. Quvondiq Qodirov ideatonda sıylı orındı iyelegen studentler menen ushırasıp, olardı qolǵa kirgizgen nátiyjesi menen qutlıqladı.

NMPI baspasóz xızmeti.