Ájiniyaz atındaǵı Nókis mámleketlik pedagogikalıq institutında 2025-2026-oqıw jılı pitkeriwshilerine diplom tapsırıwǵa baǵıshlanǵan «Haq jol Sizge, pitkeriwshi!» atamasındaǵı saltanatlı keshe bolıp ótti.

Keshege bakalavr tálim baǵdarları hám magistratura qánigelikleri pitkeriwshileri, olardıń ata-anaları, joqarı oqıw orınlarınıń basshıları, professor-oqıtıwshılar, pedagog xızmetkerler, sonday-aq, ǵalaba xabar quralları wákilleri qatnastı.

Ilajda institut rektorı w.a. Quvondiq Qodirov, «Nuranıy» qorı Qaraqalpaqstan bóliminiń baslıǵı Tursınbay Abdijabbarov, Ózbekstan kásiplik awqamları Federaciyası Qaraqalpaqstan Keńesiniń baslıǵı Ulıqbek Jalmenov, nuranıy ustaz Begdulla Sultanov, mádeniyat tarawı pidayısı Qalbay Turdiev sózge shıǵıp, barlıq pitkeriwshi jaslardı qutlıqladı hám aldaǵı jumıslarına tabıslar tiledi.

Atap ótiw orınlı, juwmaqlanıp atırǵan bıyılǵı oqıw jılında Nókis mámleketlik pedagogikalıq institutın bakalavriattıń kúndizgi, keshki hám sırtqı tálim baǵdarları boyınsha ulıwma 4 mıń 422 student, al magistratura qánigelikleri boyınsha 225 magistrant pitkerip shıqpaqta.

Pitkeriwshiler arasınan mıńlaǵan student-jaslar tiyisli jumıs beriwshiler menen úsh tárepleme shártnamalar dúziw arqalı jumıs orınlarına jollamalar aldı.

Ilajda bakalavriat tálim baǵdarları hám magistratura qánigelikleri pitkeriwshilerine diplomlar tapsırıldı.

Bıyılǵı oqıw jılı institut tariyxında úlken tabıslarǵa, joqarı nátiyjelerge tolı jıllardıń biri sıpatında tariyx betlerinen orın aldı.

Institut studentleri arasınan bıyılǵı oqıw jılınıń ózinde 15 Ózbekstan Respublikası Prezidenti hám ataqlı mámleketlik stipendiyalar, 9 Ájiniyaz Qosıbay ulı atındaǵı stipendiya jeńimpazları jetisip shıqtı.

Institut student-jasları respublikalıq hám xalıqaralıq pán olimpiadaları, «Studentler ligası», «Bes baslama olimpiadası», «Jańa Ózbekstan studentleri olimpiadası», «Jańa Ózbekstan hayal-qızlar olimpiadası» sıyaqlı sport jarıslarınıń respublikalıq final basqıshlarında joqarı nátiyjelerdi qolǵa kirgizdi.

Innovator jaslar Qaraqalpaqstan Respublikası Joqarǵı Keńesi Baslıǵı kubogi, «Bolajaq alım», «Mırza Ulıǵbek áwladları», «Eń belsendi jıl studenti» sıyaqlı tańlawlarda, respublikalıq hám xalıqaralıq grantlar tańlawlarında jeńimpaz boldı.

Ilajda oqıw jılı dawamında usınday ilim, bilimlendiriw, mádeniyat, sport hám basqa da baǵdarlarda úlken nátiyjelerge erisken studentlerdiń ata-analarına minnetdarshılıq xatları tapsırıldı.

Pitkeriw keshesi sheńberinde shólkemlestirilgen koncert baǵdarlaması qatnasıwshılardıń kewillerine joqarı kóterińkilik baǵıshladı.

NMPI baspasóz xızmeti.