Ǵárezsizligimizdiń 35 jıllıǵı, 30-iyul – Xalıqlar doslıǵı kúni hám «Áhmiyetli 90 kún» joybarı sheńberinde Ájiniyaz atındaǵı Nókis mámleketlik pedagogikalıq institutınıń 50 den aslam belsendi studentleri ushın Tashkent qalasındaǵı Islam civilizaciyası orayına ruwxıy-aǵartıwshılıq sayaxat shólkemlestirildi.

Sayaxat dawamında studentler mámleketimizdiń bay tariyxıy hám mádeniy miyrası, ullı ata-babalarımızdıń ilimniń rawajlanıwına qosqan úlken úlesi jáne islam civilizaciyasınıń biybaha dúrdanaların ózinde jámlegen siyrek ushırasatuǵın ekspoziciyalar menen jaqınnan tanıstı.

Bul sapar jaslardıń tariyxıy bilimlerin bekkemlew, milliy hám ulıwma insanıylıq qádiriyatlarǵa húrmet ruwxın arttırıw, olardıń ruwxıy dúnyaqarasın bayıtıw hám Watanǵa sadıqlıq sezimlerin jáne de kúsheytiwge xızmet etti.

Bunday ruwxıy-aǵartıwshılıq ilajlar jaslardıń bos waqtın mazmunlı shólkemlestiriw, olardı milliy qádiriyatlar ruwxında tárbiyalaw hám elimizde ámelge asırılıp atırǵan dóretiwshilik jumısları menen jaqınnan tanıstırıwda úlken áhmiyetke iye bolmaqta.