Ǵárezsizligimizdiń 35 jıllıǵı hám «Áhmiyetli 90 kún» sheńberinde Ájiniyaz atındaǵı Nókis mámleketlik pedagogikalıq institutınıń 50 den aslam belsendi studentleri ushın Tashkent qalasındaǵı Temuriyler tariyxı mámleketlik muzeyi hám Jazıwshılar qıyabanına aǵartıwshılıq sayaxat shólkemlestirildi.

Sapar dawamında studentler Temuriyler mámleketi tariyxı, ullı sárkarda hám mámleketlik ǵayratker Ámir Temur hám temuriyler dinastiyasınıń ilim, mádeniyat hám dóretiwshilik tarawındaǵı úlken miyrası menen jaqınnan tanısıw imkaniyatına iye boldı. Muzeydegi siyrek ushırasatuǵın eksponatlar hám tariyxıy dárekler jaslarda milliy tariyxımızǵa húrmet hám qızıǵıwshılıqtı jáne de bekkemledi.

Sonday-aq, Jazıwshılar qıyabanına sapar dawamında studentler ózbek hám qaraqalpaq ádebiyatı, ruwxıy-aǵartıwshılıq turmısına úlken úles qosqan belgili jazıwshılardıń esteliklerine gúl qoyıp, olardıń ómiri hám dóretiwshiligi menen tanıstı. Bul bolsa jaslarda kitapqumarlıq mádeniyatın arttırıw, milliy qádiriyatlar hám ádebiy miyrasqa húrmet sezimin jáne de kúsheytiwge xızmet etti.