Ájiniyaz atındaǵı Nókis mámleketlik pedagogikalıq institutında jumıs islewshiler hám student-jaslar arasında informaciyalıq qáwipsizlik mádeniyatın jetilistiriw, internet tarmaǵınan qáwipsiz paydalanıw kónlikpelerin qáliplestiriw hám kiberjınayatlardıń aldın alıw maqsetinde oqıw-seminarı shólkemlestirildi.

Seminarǵa Qaraqalpaqstan Respublikası Ishki isler ministrligi Kiberjınayatlarǵa qarsı gúresiw basqarmasınıń inspektorı N.Jumabaev, Mámleketlik qáwipsizlik xızmeti qánigesi N.Abduqodirov, institut rektorınıń másláhátshisi Ǵ.Ibadullaev, Cyber University mámleketlik universiteti kiberqáwipsizlik injiniringi tálim baǵdarınıń studenti X.Abdullaev, instituttıń bólim baslıqları, dekan orınbasarları, pedagog hám qánige xızmetkerler, tyutorlar, sonday-aq, student-jaslar qatnastı.

Ilajda institut rektorı w.a. Quvondiq Qodirov sózge shıǵıp, bunday seminarlar xızmetkerler hám student-jaslardıń informaciyalıq qáwipsizlik baǵdarındaǵı bilim jáne kónlikpelerin bekkemlew, kiberjınayatlarǵa qarsı gúresiwde olardıń huqıqıy mádeniyatın arttırıwǵa xızmet etetuǵınlıǵın atap ótti.

Seminarda taraw qánigeleri tárepinen búgingi kúnde ushırasıp atırǵan kiberaldawshılıq jaǵdayları, sociallıq tarmaqlar hám messendjerler arqalı ámelge asırılıp atırǵan aldıwshılıq usılları, jeke maǵlıwmatlardı qorǵaw, bank plastik kartaları hám elektron tólew sistemalarınan qáwipsiz paydalanıw boyınsha tolıq maǵlıwmatlar berildi.

Atap ótilgenindey, Qaraqalpaqstan Respublikasında usı jıldıń ótken altı ayı dawamında ishki isler uyımlarına kiberjınayatlar menen baylanıslı ulıwma 1922 múrájat kelip túsken bolıp, ulıwma keltirilgen zıyan muǵdarı 13 milliard 115 million sumdı quraǵan. Kiberjınayatlardıń 49,8 procenti zıyanlı .apk fayllardı júklep alıw menen baylanıslı jaǵdaylar aqıbetinde ámelge asırılǵan. Usı maǵlıwmattıń ózi bul máseleniń qanshelli aktual ekenligin kórsetpekte.

Seminar dawamında qatnasıwshılarǵa gúmanlı siltemeler hám belgisiz dáreklerden jiberilgen xabarlarǵa sergeklik penen qatnas jasaw, kúshli parollardan paydalanıw hám eki basqıshlı qorǵaw sistemasın qosıw sıyaqlı áhmiyetli usınıslar berildi.

Ilaj soraw-juwaplar hám pikir almasıwlar menen dawam etti.

NMPI baspasóz xızmeti.