«Áhmiyetli 90 kún» joybarı sheńberinde Ájiniyaz atındaǵı Nókis mámleketlik pedagogikalıq institutınıń Filologiya fakulteti tárepinen student-jaslardıń sın kózqarastan pikirlewi, sóylew mádeniyatı hám diskussiya júrgiziw kónlikpelerin rawajlandırıwǵa baǵdarlanǵan «Debat» intellektuallıq oyını shólkemlestirildi.

Oyın dawamında qatnasıwshılar eki toparǵa – «Tastıyıqlawshı» hám «Biykarlawshı» poziciyalarǵa bólinip, búgingi kúnniń áhmiyetli temalarınan biri bolǵan jasalma intellektten paydalanıwdıń unamlı hám unamsız tárepleri boyınsha óz pikir hám dálillerin tiykarlap qorǵadı.

Qızǵın pikir-talaslar procesinde studentler jasalma intellekttiń bilimlendiriw, ilim hám kúndelikli turmıstaǵı imkaniyatları, sonday-aq, onnan paydalanıwda júzege keliwi múmkin bolǵan ádep-ikramlılıq, huqıqıy hám sociallıq máseleler boyınsha analitikalıq pikirlerin bildirdi.

Bul intellektual oyın studentlerdiń erkin pikirlew, logikalıq pikir júrgiziw, komanda bolıp islew hám kópshilik aldında shıǵıp sóylew kónlikpelerin ele de rawajlandırıwǵa xızmet etti.

NMPI baspasóz xızmeti.