Búgin, 14-avgust kúni Ájiniyaz atındaǵı Nókis mámleketlik pedagogikalıq institutında 2026-2027-oqıw jılı ushın texnikumlardı tabıslı tamamlaǵan pitkeriwshilerdi bakalavriat tálim baǵdarlarına oqıwǵa qabıllaw boyınsha sáwbet ótkeriw procesi baslandı.

Tastıyıqlanǵan kestege muwapıq, bakalavriattıń mektepke shekemgi tálim baǵdarına sáwbet ótkerilmekte.

Sáwbet procesine instituttıń tájiriybeli professor-oqıtıwshıları menen birgelikte Qaraqalpaqstan Respublikası Mektepke shekemgi hám mektep bilimlendiriwi ministrliginiń qánigeleri, tarawda jemisli miynet etip atırǵan pedagoglar biriktirilip, talabanlardıń tayarlıǵı múnásip bahalanbaqta.

Sonday-aq, processtiń ádil túrde, ashıq-aydın ótiwi instituttıń korrupciyaǵa qarsı gúresiw «Komplaens-qadaǵalaw» sistemasın basqarıw bólimi juwapkerleri hám respublikalıq ǵalaba xabar quralları wákilleri tárepinen qadaǵalawǵa alınǵan.

– Kegeyli rayonındaǵı 3-sanlı servis texnikumın ayrıqsha bahalar menen pitkerip, usı instituttıń mektepke shekemgi tálim baǵdarına sáwbet tapsırıp shıqtım. Imtixan ádil túrde, belgilengen nızam talapları sheńberinde ótkerilmekte. Berilgen sorawlardıń hámmesine juwap berip, joqarı nátiyjege eristim. Quda qálese usı dárgaydıń studenti bolıp, óz tańlaǵan tarawım boyınsha joqarı potencialǵa iye maman kadr bolıp jetisip, keleshek áwladlar tárbiyasına óz úlesimdi qospaqshıman, – deydi Gózzal Ismetullaeva.

Maǵlıwmat ushın, sáwbet nátiyjeleri instituttıń rásmiy veb-saytında járiyalanadı.

NMPI baspasóz xızmeti.