Ájiniyaz atındaǵı Nókis mámleketlik pedagogikalıq institutı súwretlew óneri hám injenerlik grafikası kafedrasınıń docenti, kórkem ónertanıw ilimleri boyınsha filosofiya doktorı, elimizge belgili ilimpaz-pedagog Mámbetqadırov Ǵayratbay Amanbaevich dúnyadan ótti.

Ǵayratbay Mámbetqadırov 1974-jıl 1-yanvarda Moynaq rayonında ziyalılar shańaraǵında dúnyaǵa kelgen. Mektepti pitkergennen soń ol óz qızıǵıwshılıǵı boyınsha bilim alıw maqsetinde Nókis qalasındaǵı J.Shamuratov atındaǵı mámleketlik kórkem óner oqıw ornınıń reńli súwret baǵdarında oqıwın dawam ettirdi.

1994-jılı Ájiniyaz atındaǵı Nókis mámleketlik pedagogikalıq institutınıń sızıw, súwretlew óneri hám shıǵıs xalıq ónermentshiligi qánigeligine oqıwǵa qabıllanıp, bul jerdi 1999-jılı tabıslı tamamladı.

Ol miynet jolın ózi bilim alǵan institutta assistent-oqıtıwshılıqtan baslaǵan bolsa, keyin ala óziniń bilimi, uqıbı, talapshańlıǵı, miynetsúygishligi nátiyjesinde aǵa oqıtıwshı, kafedra baslıǵı lawazımlarında islep, docent ilimiy ataǵına eristi hám jámáátte úlken abıroyǵa iye boldı.

Ǵayratbay Mámbetqadırov ilimiy-pedagogikalıq baǵdardaǵı izertlewleriniń nátiyjesinde 2018-jılı «Qaraqalpaqstan músinshiliginiń qáliplesiwi hám rawajlanıwı» atamasındaǵı dissertaciyasın tabıslı qorǵap shıǵıp, kórkem ónertanıw ilimleri boyınsha filosofiya doktorı (PhD) dárejesine eristi.

Ilimiy-pedagogikalıq jumısları dawamında eki metodikalıq hám bir oqıw qollanbanı baspadan shıǵardı. Respublikalıq hám xalıqaralıq kólemdegi ilimiy jurnallarda 20 dan aslam ilimiy maqalaları, konferenciyalardıń toplamlarında kóplegen tezisleri járiyalandı.

Sonday-aq, onıń ilimiy basshılıǵında elimizdiń úmitli jasları respublikalıq hám xalıqaralıq pán olimpiadalarında, mámleketlik stipendiyalar tańlawlarında birneshe márte jeńimpaz boldı. Respublikalıq kólemde ótkeriletuǵın Ǵárezsizlik hám Nawrız bayramlarında shákirtleri menen birgelikte shólkemlestiriw jumıslarında da ayrıqsha belsendilik kórsetti.

Ol elimizdiń súwretlew óneri hám injenerlik grafikası baǵdarındaǵı jetik qánigeleriniń biri sıpatında tájiriybeli hám jas qılqálem iyeleriniń kóplegen kórgizbelerin shólkemlestiriwge de basshılıq etip, elimizdiń kórkem ónerin dúnyaǵa tanıtıwda jemisli miynet etti.

Ǵayratbay Mámbetqadırov institutımız jámááti arasında pidayılıǵı, miynetsúygishligi, talapshańlıǵı, adamgershiligi menen ayrıqsha húrmetke iye boldı.

Onıń jarqın, óshpes esteligi júreklerimizde máńgige saqlanıp qaladı.

Marhumnıń qaytıs bolıwı múnásibeti menen shańaraq aǵzaları, tuwǵan-tuwısqanları, jaqınları hám shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı hám miynet jámááti, jámiyetlik shólkemleri, Pedagogika-psixologiya hám dóretiwshilik tálim fakulteti, súwretlew óneri hám injenerlik grafikası kafedrasınıń miynet jámááti.