Ájiniyaz atındaǵı Nókis mámleketlik pedagogikalıq institutında 2026-2027-oqıw jılı baslanıwı qarsańında studentler turaq jayları hám ijara úylerine kelip jaylasqan jaslar ushın bir qatar mádeniy-aǵartıwshılıq ilajları shólkemlestirilmekte.

Atap aytqanda, instituttıń Anıq pánler hám Tariyx fakultetlerinde repressiya qurbanları hám jádidshilik háreketiniń belgili tulǵalarınıń ómiri jáne tariyxıy xızmetlerin úgit-násiyatlawǵa baǵdarlanǵan «Ǵárezsizlik sabaqları» oqıw shınıǵıwları bolıp ótti.

Ótkerilgen sabaqlar dawamında professor-oqıtıwshılar hám tiyisli juwapker qánigeler tárepinen Ózbekstan xalqınıń milliy ǵárezsizlikke erisiw jolındaǵı tariyxıy waqıyalar, ǵárezsizligimizdiń mazmunı hám áhmiyeti, sonday-aq, repressiya qurbanları hám jádidshilik háreketi tulǵalarınıń ómiri, ilimiy-aǵartıwshılıq jumısları haqqında tolıq maǵlıwmatlar berildi.

Álbette, bunday ilajlar jaslar arasında watanǵa muhabbat hám sadıqlıq sezimlerin bekkemlew menen birge tariyxımız, ata-babalarımız haqqında jańa bilimlerge iye bolıwında úlken áhmiyetke iye bolıp esaplanadı.