Ájiniyaz atındaǵı Nókis mámleketlik pedagogikalıq institutında hayal-qızlar, sonıń ishinde, jaslardıń huqıqıy hám finanslıq sawatlılıǵın arttırıwǵa baǵdarlanǵan seminar shólkemlestirildi.

Seminarǵa Qaraqalpaqstan Respublikası Básekilikti rawajlandırıw hám tutınıwshılar huqıqların qorǵaw komiteti baslıǵınıń orınbasarı S.Najimov, institut rektorınıń hayal-qızlar máseleleri boyınsha másláhátshisi S.Bekchanova, professor-oqıtıwshılar, tyutorlar hám student-qızlar qatnastı.

Ilajda qatnasıwshılarǵa tutınıwshılar dus kelip atırǵan eń tiykarǵı mashqalalar, shártnama qatnasıqlarında dıqqat qaratıw zárúr bolǵan tárepler, elektron sawda hám reklama tarawındaǵı tutınıwshı huqıqları, sonday-aq, tábiyiy jáne energiya resurslarınan aqılǵa uǵras paydalanıw boyınsha áhmiyetli túsinik hám usınıslar berildi.

Atap ótilgenindey, komitet tárepinen usı jıldıń dáslepki yarım jıllıǵında mıńnan aslam fizikalıq hám yuridikalıq táreplerdiń múrájatları kórip shıǵılǵan bolsa, 170 mıńǵa shamalas puqaranıń tutınıwshılıq huqıqları tiklengen. Tutınıwshılardan tiykarsız óndirilgen 6,2 milliard sumnan aslam qarjı qayta esaplanıp, tutınıwshılardıń máplerine sheshilgen.

Álbette, bul kórsetkishler hár bir múrájat artında insan mápi, huqıqı jáne nızamlı talabı turǵanın kórsetedi.

Seminar dawamında qatnasıwshılar ózleri dus kelip atırǵan mashqalalı jaǵdaylar haqqında aytıp ótip, sorawlarına tolıq juwap aldı.

NMPI baspasóz xızmeti.