Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasındaǵı joqarı oqıw orınları student-jasları arasında «Debat» intellektual turniri bolıp ótti.

Turnir student-jaslardıń intellektual potencialın arttırıw, olardıń erkin pikirlew, óz kózqarasın tiykarlı hám logikalıq tárizde jetkerip beriw, pikir-talas júrgiziw hám komanda bolıp islew kónlikpelerin rawajlandırıwǵa baǵdarlandı.

Intellektual turnirde bilimge qushtar hám belsendi studentler áhmiyetli máseleler boyınsha óz ara pikir almastı, berilgen temalar dógereginde óz poziciyaların alǵa qoyıp, onı anıq dáliller, logikalıq sheshimler hám turmıslıq mısallar arqalı tiykarlawǵa háreket etti.

Ásirese, pikir-talaslar dawamında qatnasıwshılardıń jedel sheshim qabıllawı, sorawǵa juwap beriw qábileti, qarsılas komandanıń pikirlerin analizlew jáne oǵan tiykarlanǵan dáliller menen juwap qaytarıw boyınsha kónlikpeleri artıp bardı.

Turnir juwmaǵında barlıq qatnasıwshılar institut Jaslar awqamı baslanǵısh shólkemi tárepinen húrmet jarlıqları hám estelik sawǵaları menen sıylıqlandı.

Bul turnir jaslardıń bilim hám intellektual dárejesin sınaqtan ótkeriw menen birge, olar arasında óz ara pikir almasıw ortalıǵın payda etiw hám doslıq qatnasıqların bekkemlewge xızmet etti.

NMPI baspasóz xızmeti.