Ájiniyaz atındaǵı Nókis mámleketlik pedagogikalıq institutında pitkeriwshi studentlerdi qollap-quwatlaw, olardıń bántligin támiyinlew, isbilermenlik baslamaların ámelge asırıw hám miynet bazarına tabıslı kirip barıwına járdemlesiw maqsetinde «Keleshekke qádem» baǵdarlaması sheńberinde seminar-trening shólkemlestirildi.

Onda «Ózmilliybank» AJ Qaraqalpaqstan Respublikası Bas basqarması qánigesi K.Sharipova, jaslar menen islesiw, ruwxıylıq hám aǵartıwshılıq bólimi baslıǵı A.Bazarbaev, jámiyetlik pánler kafedrası docenti T.Tadjiev, Tábiyiy pánler fakulteti 4-kurs studenti, birneshe grant joybarlarınıń avtorı K.Qızılbaeva hám pitkeriwshi studentler qatnastı.

Ilajda sózge shıqqanlar mámleketimizde jaslardı hár tárepleme qollap-quwatlaw, olardıń bántligin támiyinlew, baslama hám umtılısların júzege shıǵarıw, ásirese, joqarı bilimlendiriw mákemeleri pitkeriwshileriniń múnásip jumıs orınlarına iye bolıwı ushın jaratılıp atırǵan imkaniyatlarǵa toqtalıp ótti.

Sonday-aq, Ózbekstan Respublikası Prezidentiniń «Jaslar isbilermenligin hám olardıń bántligin támiyinlewge baǵdarlanǵan biznes joybarlardı qollap-quwatlaw sistemasın jetilistiriw ilajları haqqında»ǵı, «Joqarı bilimlendiriw shólkemleri pitkeriwshileriniń jumısqa jaylasıwına járdemlesiw boyınsha qosımsha ilajlar haqqında»ǵı jáne «Jaslar isbilermenligin rawajlandırıw hám bántligin támiyinlewge baylanıslı qosımsha ilajlar haqqında»ǵı qararlarında belgilengen wazıypalardıń mazmunı hám áhmiyeti haqqında maǵlıwmat berildi.

Usı qararlar tiykarında ámelge asırılıp atırǵan «Keleshekke qádem» baǵdarlaması joqarı bilimlendiriw shólkemleri pitkeriwshileriniń bántligin támiyinlew, olardıń biznes ideyaların qollap-quwatlaw hám miynet bazarına beyimlesiwine járdemlesiwge baǵdarlanǵanı atap ótildi. Bul baǵdarlama sheńberinde pitkeriwshi studentlerge óz biznes ideyaların islep shıǵıwdan baslap, olardı ámeliy joybarǵa aylandırıw hám qarjılandırıwǵa shekemgi processlerde járdem kórsetiliwi názerde tutılǵan.

Sonday-aq, jaslar ushın jańadan jolǵa qoyılǵan «Studentke járdemshi» hám «DualEdu» kredit paketleri haqqında da maǵlıwmat berilip, studentlerge biznes ideyaların qáliplestiriw, tiyisli biznes-reje islep shıǵıw hám qarjılandırıw máselelerinde bankke hám «Keleshekke qádem» orayına múrájat etiwi múmkin ekenligi túsindirildi.

Seminar-trening dawamında pitkeriwshi studentler ózlerin qızıqtırǵan sorawlar menen qánigelerge múrájat etip, kredit alıw shártleri, biznes joybarlardı qarjılandırıw, biznes-reje tayarlaw, grant hám basqa da qarjı imkaniyatlarınan paydalanıw hám isbilermenlik jumısın baslaw tártibi boyınsha tolıq juwaplar aldı.

NMPI baspasóz xızmeti.