Ájiniyaz atındaǵı Nókis mámleketlik pedagogikalıq institutı Filologiya fakulteti qaraqalpaq ádebiyatı kafedrası tárepinen «Túrkiy tilles xalıqlar ádebiyatı tariyxı, folklorın úyreniwdiń áhmiyetli máseleleri hám innovaciyalıq qatnaslar» atamasındaǵı xalıqaralıq ilimiy-teoriyalıq konferenciya shólkemlestirildi.

Onda túrkiy xalıqlar ádebiyatı hám folklorınıń rawajlanıw tariyxı, ózine tán kórkem-estetikalıq ózgeshelikleri, milliy qádiriyatlardı sáwlelendiriwdegi ornı, folklor úlgilerin ilimiy-izertlewdiń zamanagóy metodları, sonday-aq, ádebiyattanıw hám folklortanıw tarawında innovaciyalıq qatnaslardı engiziw máseleleri dodalandı.

Konferenciyaǵa Túrkiya, Ázerbayjan, Qazaqstan hám respublikamızdaǵı aldınǵı joqarı oqıw orınları, ilimiy oraylarınan professor-oqıtıwshılar, ilimpazlar hám izleniwshiler, doktorantlar, magistrantlar hám studentler qatnastı.

Ilaj dawamında túrkiy tilli xalıqlar ádebiyatı tariyxınıń áhmiyetli basqıshları, klassikalıq hám zamanagóy ádebiyat úlgileri, xalıq awızeki dóretiwshiliginiń janrlıq ózgeshelikleri, dástanshılıq dástúrleri, xalıq qosıqları, naqıl-maqallar, ańızlardıń kórkemlik jáne tariyxıy áhmiyeti boyınsha pikir-usınıslar bildirildi.

Ádebiyat hám folklor úlgilerin úyreniwde sanlı texnologiyalar, zamanagóy izertlew metodları, ilimler aralıq qatnas hám xalıqaralıq ilimiy birge islesiwdiń imkaniyatları tuwralı pikir almasıldı.

Konferenciya óz jumısın belgilengen sekciyalarda dawam ettirdi.

NMPI baspasóz xızmeti.