Ájiniyaz atındaǵı Nókis mámleketlik pedagogikalıq institutında Ózbekstan mámleketlik emes kommerciyalıq emes shólkemleri milliy associaciyası hám Shıǵındılardı basqarıw hám cirkulyar ekonomikanı rawajlandırıw agentligi menen birgelikte ámelge asırılıp atırǵan «Qattı turmıslıq shıǵındılardı turaqlı basqarıw» joybarı sheńberinde «Taza qala» oqıw kampaniyası ótkerildi.

Ilajǵa ekologiya tarawınıń qánigeleri, mámleketlik emes kommerciyalıq emes shólkemlerdiń wákilleri, professor-oqıtıwshılar, student-jaslar, eko-belsendiler hám máhálle belsendileri qatnastı.

Oqıw kampaniyası dawamında shıǵındılardı óz aldına jıynaw hám saylap alıw, olardı azaytıw, qayta paydalanıw, qayta islew, juwapkershilikli tutınıw hám cirkulyar ekonomika principleri haqqında maǵlıwmatlar berildi.

Ilajda jaslardıń ekologiyalıq mádeniyatın arttırıw, olardı ekologiyalıq baslamalarǵa keńnen tartıw hám «Nol shıǵındı» ideyasın úgit-násiyatlaw máselelerine ayrıqsha itibar qaratıldı.

Bul kampaniya qorshaǵan ortalıqtı saqlaw, ekologiyalıq juwapkershilikti kúsheytiw hám jaslar arasında shıǵındılardı juwapkershilikli basqarıw mádeniyatın qáliplestiriwge xızmet etti.

NMPI baspasóz xızmeti.