Ájiniyaz atındaǵı Nókis mámleketlik pedagogikalıq institutında jaslar arasında tınıshlıq hám paraxatshılıqtıń qádirine jetiw, hár qıylı jat ideyalar jáne ruwxıy qáwiplerlerge qarsı ideologiyalıq immunitetti qáliplestiriw, aǵartıwshılıq hám bilimniń insan ómirindegi áhmiyetin úgit-násiyatlawǵa arnalǵan ushırasıw shólkemlestirildi.

«Tınıshlıq – eń ullı baylıq» hám «Jawızlıqqa qarsı – aǵartıwshılıq penen gúresiw» atamalarında ótkerilgen ilajǵa institut rektorı w.a. Q.Qodirov, rektor másláhátshisi Ǵ.Ibadullaev, Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarmasınıń bas qánigesi N.Jamalov, Qaraqalpaqstan Respublikası Ishki isler ministrligi Nókis qalalıq Ishki isler basqarması terrorizmge qarsı gúresiw bólimi operativ wákili, aǵa leytenant N.Muhammaddinov, Muhammed ibn Ahmed ál-Beruniy atındaǵı orta arnawlı islam oqıw ornınıń prorektorı Q.Mámbetov, instituttıń jaslar máseleleri boyınsha juwapkerleri jáne student-jaslar qatnastı.

Ushırasıw dawamında tınıshlıq hám turaqlılıq insan rawajlanıwı, jámiyettiń abadanlıǵı hám jas áwladtıń keleshegi ushın eń áhmiyetli faktorlardıń biri ekenligi atap ótildi. Búgingi globallasıw sharayatında jaslardı túrli informaciyalıq qáwipler, buzǵınshı ideyalar hám ruwxıy qáwiplerden qorǵaw, olarda erkin pikirlew, waqıya-hádiyselerge sın hám analitikalıq qatnas kónlikpelerin qáliplestiriw áhmiyetli wazıypa ekenligine toqtaldı.

Jawızlıqtıń aldın alıwdıń eń nátiyjeli jolı – ilim, bilimlendiriw, tárbiya hám aǵartıwshılıq ekeni, jaslardıń bos waqtın mazmunlı shólkemlestiriw, olardı kitapqumarlıq, ilimiy-dóretiwshilik izleniwler, sport hám hár qıylı paydalı shınıǵıwlarǵa keńnen tartıw zárúrligi haqqında pikirler bildirildi.

Ilajda tınıshlıq hám paraxatshılıqtı saqlaw, jámiyetlik turmısta belsendi puqaralıq poziciyasın kórsetiw, bilim hám aǵartıwshılıq arqalı túrli unamsız tásirlerge qarsı turıw boyınsha zárúr bolǵan usınıslar berildi.

NMPI baspasóz xızmeti.