Ájiniyaz atındaǵı Nókis mámleketlik pedagogikalıq institutında 1-oktyabr – Muǵallimler hám ustazlar kúnine arnalǵan bayram keshesi bolıp ótti.

Ilajǵa institut basshıları, professor-oqıtıwshılar, pedagog xızmetkerler hám student-jaslar qatnastı.

Bayram keshesinde institut rektorı w.a. Quvondiq Qodirov sózge shıǵıp, ustaz hám oqıtıwshılardıń jámiyetlik turmıstaǵı ornı, jas áwladtı bilimli, ruwxıy jaqtan jetik hám watanǵa sadıq insanlar etip tárbiyalawdaǵı pidayı miynetlerin ayrıqsha atap ótti. Tálim hám tárbiya tarawında kóp jıllardan berli nátiyjeli jumıs alıp barıp atırǵan, ilimiy-pedagogikalıq processlerde óziniń múnásip úlesin qosıp kiyatırǵan professor-oqıtıwshılarǵa minnetdarshılıq bildirdi.

Keshe dawamında ilimiy-pedagogikalıq, tálim-tárbiya jumıslarında ayrıqsha úlgi bolıp atırǵan bir topar professor-oqıtıwshılar Ózbekstan Respublikası Joqarı bilimlendiriw, ilim hám innovaciyalar ministrliginiń «Joqarı bilimlendiriw aǵlası» kókirek belgisi menen sıylıqlandı.

Sonday-aq, institut rektorınıń húrmet jarlıqları hám kásiplik awqamı komiteti tárepinen tayarlanǵan bayram sawǵaları ustazlar jáne oqıtıwshılarǵa saltanatlı túrde tapsırıldı.

Bayram keshesi instituttıń qábiletli studentleri hám «Tumaris» xalıq ansambli tárepinen tayarlanǵan koncert baǵdarlaması menen dawam etti. Onda jańlaǵan qosıqlar, ayaq-oyınlar ustazlarǵa bayram keypiyatın inám etti.

NMPI baspasóz xızmeti.