Ájiniyaz atındaǵı Nókis mámleketlik pedagogikalıq institutı málimleme-resurs orayında 1-oktyabr – Muǵallimler hám ustazlar kúni múnásibeti menen «Ustaz – máńgilik shamshıraq» atamasındaǵı ushırasıw keshesi shólkemlestirildi.

Ushırasıwǵa dene tárbiya hám sport kafedrasınıń baslıǵı, pedagogika ilimleri boyınsha filosofiya doktorı (PhD), professor Asqarbay Niyazov, usı kafedranıń aǵa oqıtıwshısı Jamal Bekmuratov, málimleme-resurs orayı direktorı Gúlayım Jiyemuratova, Anıq pánler fakulteti dekan orınbasarı Xalmurat Esemuratov, tyutorlar hám student-jaslar qatnastı.

Ilajdı oraydıń sırt el málimleme-kitapxana resursları menen islew bólimi baslıǵı Rita Amanbaeva basqarıp bardı.

Ushırasıwda miyman ustazlar ózleriniń sport hám ilimiy-pedagogikalıq tarawlardaǵı tájiriybeleri menen bólisip, ómir jolındaǵı ustaz hám trenerleri, jaslarǵa sport penen shuǵıllanıwdıń paydalı tárepleri haqqında maǵlıwmatlar berdi.

Keshe miymanlarına instituttıń kásiplik awqamı komiteti tárepinen tayarlanǵan bayram sawǵaları tapsırıldı.

Ilaj instituttıń muzıkalıq tálim baǵdarı studentleriniń atqarıwındaǵı koncert baǵdarlaması menen dawam etti.

NMPI baspasóz xızmeti.