Búgin, 5-oktyabr kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti janındaǵı Perspektivalı kadrlardı tayarlaw boyınsha «El-yurt umidi» qorı tárepinen úgit-násiyat seminarı shólkemlestirildi.

Seminarǵa qordıń atqarıwshı direktorınıń orınbasarı D.Abdurashidov, bas inspektorı Q.Bektemirov, tańlawlardı shólkemlestiriw boyınsha jetekshi inspektorı A.Kenjabaev, inspektor R.Aytmuratova, Qaraqalpaqstan Respublikası Ministrler Keńesi sekretariat baslıǵı B.Qálimbetov, Mektepke shekemgi hám mektep bilimlendiriwi ministriniń birinshi orınbasarı A.Dáwletbaev, sonday-aq, joqarı oqıw orınlarınıń studentleri, ulıwma bilim beriw mektepleriniń juwapkerleri hám pitkeriwshi klass oqıwshıları, jaslar jetekshileri, jas mámleketlik xızmetkerler qatnastı.

Ilajdı institut rektorı w.a. Quvondiq Qodirov basqarıp bardı.

Seminardıń baslı maqseti – qábiletli jaslardı qollap-quwatlaw, olardı sırt ellerdiń abıroylı bilimlendiriw mákemelerinde oqıw imkaniyatları menen tanıstırıw, «El-yurt umidi» qorınıń bilimlendiriw baǵdarlamaları hám stipendiya imkaniyatları haqqında túsinik beriw, sonday-aq, jaslardıń bilim hám potencialın arttırıwǵa kómeklesiwden ibarat.

Seminar qatnasıwshılar menen pikir almasıwlar hám soraw-juwaplar menen dawam etti.

NMPI baspasóz xızmeti.