Ájiniyaz atındaǵı Nókis mámleketlik pedagogikalıq institutında studentlerdiń demalıs dáwirinde sırt elde waqıtsha jumıs islewi, xalıqaralıq tájiriybe arttırıwı, sayaxat etiwi hám bos waqtın mazmunlı shólkemlestiriw imkaniyatların keńeytiwge baǵdarlanǵan ushırasıw shólkemlestirildi.

Ushırasıwǵa institut studentleri hám «Work and Travel» baǵdarlaması tiykarında sırt elde jumıs islewdi shólkemlestiriw menen shuǵıllanatuǵın tiyisli konsalting firmalardıń juwapkerleri qatnastı.

Ilajda institut rektorı w.a. Quvondiq Qodirov sózge shıǵıp, studentler ushın sırt elde nızamlı tiykarda waqıtsha jumıs islew, shet tilleri boyınsha bilim hám kónlikpelerin bekkemlew, hár túrli mádeniyatlar menen jaqınnan tanısıw jáne xalıqaralıq tájiriybe arttırıwdıń áhmiyetine toqtaldı.

Ushırasıw dawamında studentlerge «Work and Travel» baǵdarlamasınıń mazmunı, onda qatnasıw talapları, hújjetlerdi rásmiylestiriw tártibi, sırt elde jumıs islew shártleri, baǵdarlama sheńberinde jaratılatuǵın imkaniyatlar, sonday-aq, qatnasıwshılardıń huqıq hám minnetleri haqqında tolıq maǵlıwmat berildi.

NMPI baspasóz xızmeti.