Ájiniyaz atındaǵı Nókis mámleketlik pedagogikalıq institutı Tariyx fakultetinde usı atamada shólkemlestirilgen ushırasıwda búgingi kúnde jámiyettiń rawajlanıwına unamsız tásir kórsetiwshi faktorlardan biri bolǵan korrupciyanıń aldın alıw, onıń kelip shıǵıw sebeplerin saplastırıw hám korrupciyaǵa qarsı mawasasız múnásibetti qáliplestiriw áhmiyetli wazıypalardan biri ekenligi atap ótildi.

Ushırasıwda korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı Sh.Shamuratov, fakultet dekanatı juwapkerleri hám professor-oqıtıwshılar qatnastı.

Ilajda shıǵıp sóylegenler, korrupciyanıń aldın alıwda bilimlendiriw sistemasınıń ornı ayrıqsha áhmiyetke iye ekenin atap ótti. Bilimlendiriw mákemelerinde jumıs alıp barıp atırǵan hár bir professor-oqıtıwshı óziniń xızmet wazıypaların shın kewilden orınlawı, bilimlendiriw procesinde qalıslıq, ádillik, ashıq-aydınlıq hám nızamlılıq principlerine qatań ámel etiwi kerek ekenligin bildirdi.

Professor-oqıtıwshılardıń kásiplik jumısında korrupciyalıq jaǵdaylarǵa jol qoymaw, mápler soqlıǵısıwınıń aldın alıw, xızmet wákilliklerinen durıs hám nızamlı paydalanıw jáne bilimlendiriw procesiniń ashıq-aydınlıǵın támiyinlew máselelerine ayrıqsha itibar qaratıw zárúrligin atap ótti.

Ushırasıw dawamında professor-oqıtıwshılar tárepinen korrupciyanıń aldın alıw, bilimlendiriw procesinde ashıq-aydınlıqtı támiyinlew máseleleri boyınsha pikir-usınıslar bildirildi.