Ájiniyaz atındaǵı Nókis mámleketlik pedagogikalıq institutında Jaslar awqamı baslanǵısh shólkemi hám ziyrek studentlerdiń ilimiy-izertlew jumısların shólkemlestiriw bólimi menen birgelikte student-jaslardıń innovaciyalıq ideyaların qollap-quwatlaw, startap joybarlarǵa bolǵan qızıǵıwshılıǵın arttırıw, isbilermenlik kónlikpelerin rawajlandırıw, sonday-aq, óz ara tájiriybe almasıwı ushın imkaniyat jaratıw maqsetinde «Founders Night» – startap hám jańa ideyalar keshesi shólkemlestirildi.

Keshege Qaraqalpaqstan Respublikası Joqarǵı Keńesi Apparatınıń Sanlastırıw hám jasalma intellekt texnologiyaları sektorı baslıǵı Q.Seytnazarov, Ministrler Keńesi janındaǵı Grantlardı tartıw orayı direktorınıń orınbasarı M.Paxratdinov, IT Park Qaraqalpaqstan direktorı B.Tóremuratova, IT Park startap menedjeri B.Ubaydullaev, instituttıń tiyisli juwapkerleri, qábiletli student-jaslar qatnastı.

Ilaj jaslardıń dóretiwshilik hám intellektuallıq potencialın júzege shıǵarıw, olardı jańasha pikirlewge baǵdarlaw, mashqalalarǵa innovaciyalıq sheshimler tabıw hám perspektivalı joybarlardı islep shıǵıwdı xoshametlewge baǵdarlandı.

Baǵdarlama sheńberinde qatnasıwshılar «Startap jolı» atamasındaǵı qısqa metrajlı filmdi tamashaladı. Sonday-aq, shólkemlestirilgen Workshop shınıǵıwları arqalı startaplar dúnyası, jańa ideyalardı rawajlandırıw hám olardı ámeliyatqa engiziw boyınsha bilim jáne kónlikpelerin arttırıw imkaniyatına iye boldı.

Kesheniń eń qızıqlı bólimleriniń biri qatnasıwshılarǵa belgili bir mashqalanı sheshiw boyınsha óz usınısların bildiriw wazıypası berilgen interaktiv shárt boldı. Bunda hár bir qatnasıwshıǵa óz ideyasın qısqa hám anıq sáwlelendiriw ushın bir minut waqıt ajıratıldı. Qatnasıwshılardıń kreativ qatnası, jedel pikirlewi hám mashqalaǵa ádettegidey bolmaǵan sheshim usınıs etiw qábileti sınaqtan ótkerildi.

Eń jaqsı kreativ sheshimlerdiń avtorları institut rektoratı tárepinen qarjılay sıylıqlandı.

«Founders Night» student-jaslar ushın jańa bilim hám tájiriybe arttırıw menen birge, pikirlesler menen tanısıw, óz ara birge islesiw baylanısların jolǵa qoyıw hám keleshektegi startap joybarlar ushın jańa ideyalar alıw maydanına aylandı.

NMPI baspasóz xızmeti.