Ájiniyaz atındaǵı Nókis mámleketlik pedagogikalıq institutında «Milliy qádiriyatlar hám olardıń millet ruwxıylıǵındaǵı ornı» atamasında ruwxıy-aǵartıwshılıq ushırasıwı shólkemlestirildi.

Ushırasıwda Nókis qalasındaǵı Muhammed ibn Ahmed ál-Beruniy atındaǵı orta arnawlı islam oqıw ornı direktorınıń orınbasarı Qabıl Mámbetov hám Din isleri boyınsha komitettiń Qaraqalpaqstan Respublikası aymaqlıq basqarması Nókis qalalıq bólimi bas qánigesi Xudaybergen Nizamatov qatnastı.

Ilaj dawamında milliy qádiriyatlardıń xalqımız turmısındaǵı ornı, ata-babalardan miyras bolıp kiyatırǵan úrp-ádet hám dástúrlerdi qásterlep saqlaw, jas áwlad qálbinde milliy ózlikti ańlaw, Watanǵa muhabbat hám ruwxıy juwapkershilik sezimlerin bekkemlew máseleleri haqqında sóz etildi.

Sonday-aq, milliy hám ulıwma insanıylıq qádiriyatlardıń óz ara úylesimliligi, jámiyette keńpeyillik hám óz ara húrmet ortalıǵın bekkemlew, jaslardı hár qıylı jat ideyalar tásirinen saqlawda ruwxıy-aǵartıwshılıq tárbiyanıń áhmiyeti boyınsha pikir-usınıslar bildirildi.

Ushırasıw jaslardıń milliy qádiriyatlarǵa húrmetin arttırıw, olardıń ruwxıy dúnyaqarasın bayıtıw jáne jámiyetlik turmısta belsene hám juwapkershilikli poziciyanı qáliplestiriwge xızmet etti.

NMPI baspasóz xızmeti.