Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasındaǵı joqarı oqıw orınlarınıń student-jasları arasında «Debat» intellektual turniriniń aymaqlıq basqıshı shólkemlestirildi.

Bul turnir jaslardıń intellektuallıq potencialın arttırıw, erkin hám sın kózqarastan pikirlew kónlikpelerin rawajlandırıw, óz poziciyasın tiykarlanǵan dáliller menen qorǵaw jáne komanda bolıp islew mádeniyatın qáliplestiriwge baǵdarlanǵanı menen áhmiyetli bolıp esaplanadı.

Jarıs dawamında qatnasıwshılar hár qıylı temalar boyınsha óz pikir-usınısların bildiriw, alǵa qoyılǵan ideyalardı tallaw, logikalıq dáliller tiykarında básekilesiw hám qarsılas komandalardıń pikirlerine múnásip múnásibet bildiriw boyınsha óz bilim hám sheberliklerin kórsetti.

Qızǵın hám mawasasız ótken turnir dawamında komandalardıń tayarlıǵı, jedel pikirlewi, logikalıq pikir júrgiziwi, sóylew mádeniyatı hám óz poziciyasın isenimli qorǵaw qábiletine ayrıqsha itibar qaratıldı.

Turnirdiń aymaqlıq basqıshı juwmaǵında:

1-orın – Ájiniyaz atındaǵı Nókis mámleketlik pedagogikalıq institutınıń «Sahra búlbilleri»;

2-orın – Qaraqalpaqstan medicina institutınıń «Med liderler»;

3-orın – Nókis mámleketlik texnika universitetiniń «Texnika» komandalarına nesip etti.

Bunday intellektuallıq jarıslar student-jaslardıń bilim hám dúnyaqarasın keńeytiw, olarda salamat pikirlew hám debat alıp barıw mádeniyatın qáliplestiriw, sonday-aq, belsendi, intaker hám jetekshilik potencialına iye jaslardı anıqlawda áhmiyetli orın iyeleydi.

Aymaqlıq basqısh jaslar arasında intellektuallıq báseki ortalıǵın rawajlandırıw, joqarı oqıw orınları studentleri arasındaǵı birge islesiwdi bekkemlew jáne bilim hám pikirlewge tiykarlanǵan qarım-qatnas mádeniyatın keńnen úgit-násiyatlawǵa xızmet etedi.

NMPI baspasóz xızmeti.