Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakulteti mektepke shekemgi tárbiya hám defektologiya kafedrası janındaǵı «Ilim bulaǵı» ilimiy dógereginiń joybarı tiykarında dógerek basshısı, docent E.Orazımbetovtıń shólkemlestiriwinde ádiwli ustaz, jámiyetlik ǵayratker, belgili shayır, qaharman ana Dáme Allamaqovanıń 90 jıllıǵına arnalǵan «Ustazlardı eslep» atamasındaǵı konferenciya ótkerildi.

Konferenciyaǵa respublikamızǵa belgili ilimpazlar, mámleketlik hám jámiyetlik ǵayratkerler, institut professor-oqıtıwshıları, student-jaslar qatnastı.

Konferenciyada sózge shıqqan bayanatshılar ustaz hám shayır Dáme Allamaqovanıń ómiri, miynet hám ilimiy-dóretiwshilik jolı, jaslardı hár tárepleme bilim alıwǵa, ilim iyelewge, turmısqa tárbiyalawdaǵı hám respublikamız xalıq xojalıǵınıń túrli tarawlarına qánige tayarlawdaǵı pedagogikalıq xızmetleri haqqında maǵlıwmatlar berdi.

Dáme Allamaqova xalqımız arasında shayır sıpatında da belgili bolıp, onıń «Ana mehri», «Anam dermen» atamalarındaǵı kitapları baspadan shıqqan.

Óz qosıqları arqalı ol ata-ananıń perzentine bolǵan muhabbatı, tuwılıp ósip, kindik qanımız tamǵan ana Watanımızǵa bolǵan súyispenshilik sezimleri menen birge, dúnyada tınıshlıq, paraxatshılıqtıń ornawı, adamlardıń hámiyshe bir-birine járdem beriwi, jaqsılıq etiwi sıyaqlı ulıwma insanıylıq ideyalar, insan óz miyneti menen baxıtlı hám abadan turmısqa erisiwi sıyaqlı iygilikli maqsetlerdi jırladı.

Shayırdıń qálemine tiyisli «Jaqsı adamlar», «Qaraqalpaq qızıman», «Keler» hám t.b. qosıqlar xalqımız tárepinen súyip oqılatuǵın poeziyalıq dóretpeler bolıp esaplanadı.

Konferenciyaǵa Dáme Allamaqovanıń shákirtleri, perzentleri hám aǵayinleri de qatnasıp, ilajdı shólkemlestiriwshilerge minnetdarshılıq bildirdi.

NMPI baspasóz xızmeti.