Ózbekstan Respublikasınıń «Mámleketlik til haqqında»ǵı Nızamı qabıl etilgeniniń 37 jıllıǵı hám 21-oktyabr – Ózbek tili bayramı kúni múnásibeti menen Ájiniyaz atındaǵı Nókis mámleketlik pedagogikalıq institutında «Ózbek tili – milliy ózligimiz belgisi» atamasındaǵı ruwxıy-aǵartıwshılıq hám bayram ilajı shólkemlestirildi.

Ilajǵa mámleketlik hám jámiyetlik ǵayratkerler, jazıwshı hám shayırlar, belgili filolog ilimpazlar, professor-oqıtıwshılar, jas izleniwshiler, student-jaslar, keń jámiyetshilik hám ǵalaba xabar quralları wákilleri qatnastı.

Bayram ilajında instituttıń ózbek tili kafedrasınıń docenti M.Xudayarova, qazaq, túrkmen tili hám ádebiyatı kafedrasınıń docenti B.Bekniyazov, ózbek ádebiyatı kafedrasınıń docenti N.Allambergenova ózbek tiliniń dúnya tilleri arasındaǵı ornı, túrkiy tiller menen baylanısları hám mámleketlik til sıpatındaǵı áhmiyetine baylanıslı bayanatların oqıp berdi.

Atap ótilgenindey, bunnan 37 jıl burın, yaǵnıy 1989-jılı 21-oktyabr kúni Ózbekstan Respublikasınıń «Mámleketlik til haqqında»ǵı Nızamı qabıl etilip, ózbek tiline mámleketlik til biyligi berilgen edi.

Ózbekstan Respublikası Prezidentiniń «Ózbek tiliniń mámleketlik til sıpatındaǵı abıroyı hám mártebesin túp-tiykarınan arttırıw ilajları haqqında»ǵı pármanına muwapıq, respublikamızda 21-oktyabr – Ózbek tili bayramı kúni sıpatında keń túrde belgilenip kelinbekte.

Ózbekstan Respublikası Prezidenti Shavkat Mirziyoevtiń xalqımızǵa bayram qutlıqlawında keltirip ótkenindey, sońǵı jıllarda elimizde ózbek tilin rawajlandırıw, onıń turmısımızdaǵı ornı hám tásirin arttırıw boyınsha jańa basqısh baslandı.

Atap aytqanda, 21-oktyabr – Ózbek tili bayramı kúni dep belgilengeni umıtılmas, tariyxıy waqıyaǵa aylandı. Mámleketlik tildiń abıroyı hám mártebesin arttırıwǵa baǵdarlanǵan párman hám qararlar, normativlik hújjetler qabıl etildi. Bul baǵdarda 2020-2030-jıllarǵa mólsherlengen koncepciya hám ayrıqsha baǵdarlama turmısqa engizilmekte.

Bayram ilajında bayanatshılar hám sózge shıǵıwshılar tárepinen ózbek tiliniń dúnya tilleri arasındaǵı abıroyın arttırıw, elimizde mámleketlik til sıpatındaǵı mártebesin, qollanılıwın bunnan bılay da jetilistiriw, filologiya baǵdarında jańa baǵdarlarda ilimiy-izertlew jumısların alıp barıw maqsetinde aldaǵı waqıtlarda ámelge asırılatuǵın jumıslar haqqında da pikirler bildirildi.

Ilaj instituttıń «Tumaris» xalıq ansambli, «Sıy perde» hám «Tarannum» ansamblleri aǵzaları, Filologiya fakultetiniń qábiletli studentleri atqarıwındaǵı bayram koncerti menen dawam etti.

NMPI baspasóz xızmeti.