Ájiniyaz atındaǵı Nókis mámleketlik pedagogikalıq institutında 21-oktyabr – Ózbek tili bayramı kúni hám ózbek tiline mámleketlik til biyligi berilgeniniń 37 jıllıǵı múnásibeti menen Jaslar awqamı baslanǵısh shólkemi hám ózbek tili kafedrası tárepinen student-jaslar arasında «Jańa Ózbekstan jasları» súreni tiykarında «Til – millet maqtanıshı» atamasında ǵalabalıq diktant tańlawı shólkemlestirildi.

Tańlawdıń tiykarǵı maqseti – student-jaslardıń mámleketlik tilge bolǵan húrmetin arttırıw, ózbek tiliniń bay imkaniyatların keń úgit-násiyatlaw, sawatlılıq dárejesin jetilistiriw hám milliy qádiriyatlarǵa sadıqlıq sezimin bekkemlewden ibarat.

Ǵalabalıq diktant tańlawına instituttıń barlıq fakultetlerinen 300 den aslam student-jaslar qatnasıp, mámleketlik til boyınsha óz bilim hám kónlikpelerin sınaqtan ótkerdi.

Tańlaw juwmaqları boyınsha mámleketlik til normalarına juwap beretuǵın eń jaqsı diktant jumısları anıqlanıp, jeńimpazlar hám sıylı orın iyeleri diplom jáne estelik sawǵaları menen sıylıqlanadı.

Bul baslama jaslar arasında mámleketlik til boyınsha sawatlılıq hám imla mádeniyatın arttırıw, ózbek tiliniń abıroyın bunnan bılay da joqarılatıwda úlken áhmiyetke iye boldı.

NMPI baspasóz xızmeti.