Ájiniyaz atındaǵı Nókis mámleketlik pedagogikalıq institutı professor-oqıtıwshıları hám xızmetkerleriniń mádeniy dem alıwı, tariyxıy miyrasımız haqqındaǵı bilimlerin jáne de bayıtıw hám elimizdiń dıqqatqa ılayıqlı orınları menen jaqınnan tanısıw maqsetinde Tashkent qalasına sayaxat shólkemlestirildi.

Ózbekstan kásiplik awqamları Federaciyasınıń Qaraqalpaqstan Keńesi tárepinen shólkemlestirilgen sayaxat dawamında qatnasıwshılar bir qatar tariyxıy, ruwxıy-aǵartıwshılıq hám mádeniy orınlarǵa bardı.

Sonıń ishinde, sayaxat qatnasıwshıları Ózbekstandaǵı Islam civilizaciyası orayı, Temuriyler tariyxı mámleketlik muzeyi, Ózbekstan tariyxı mámleketlik muzeyi hám Jeńis parkinde bolıp, xalqımızdıń bay tariyxıy miyrası, ullı ata-babalarımızdıń ilim hám mádeniyattıń rawajlanıwına qosqan úlesi, sonday-aq, Watan azatlıǵı hám tınıshlıǵı jolında kórsetilgen mártlik haqqında bahalı maǵlıwmatlarǵa iye boldı.

Sonday-aq, sayaxat baǵdarlamasınan paytaxttıń basqa da tariyxıy hám kewilashar orınlarına saparlar da orın aldı. Bul bolsa qatnasıwshılarǵa qızıqlı dem alıw, óz ara pikirlesiw hám tásirler almasıw imkaniyatın berdi.