Ájiniyaz atındaǵı Nókis mámleketlik pedagogikalıq institutı málimleme-resurs orayında Ózbekstan Respublikası Ádillik ministrligi tárepinen járiyalanǵan «Avtorlıq huqıqtı qorǵaw aylıǵı» sheńberinde ámeliy seminar-trening shólkemlestirildi.

«Kitapxana hám avtorlıq huqıqı: kitapxanashı nelerdi biliwi kerek?» hám «Avtorlıq huqıqı, plagiat hám akademiyalıq hadallıq» temalarına baǵıshlanǵan ilajda intellektuallıq múlkti qorǵaw, kitapxana jumısında avtorlıq huqıqı talaplarına ámel etiw hám bilimlendiriw procesinde akademiyalıq hadallıq principlerin bekkemlew máseleleri dodalandı.

Seminarǵa Ádillik ministrligi janındaǵı Intellektuallıq múlk orayı Qaraqalpaqstan Respublikası filialı bas másláhátshisi Nuralı Esnazarov, Qaraqalpaqstan Respublikası Ádillik ministrligi sektor baslıǵı Rasul Dushanov hám usı sektor másláhátshisi Ájiniyaz Nurabullaev, sonday-aq, institut hám birge islesiwshi joqarı oqıw orınları málimleme-resurs orayı xızmetkerleri qatnastı.

Seminardı oraydıń direktorı Gúlayım Jiyemuratova alıp bardı.

Seminar dawamında qánigeler tárepinen zamanagóy kitapxanalarda intellektuallıq múlkti qorǵaw, elektron málimleme resurslarınan paydalanıwdıń huqıqıy tiykarları, avtorlıq huqıqına baylanıslı nızamshılıq talapları hám tarawdaǵı áhmiyetli máseleler boyınsha tolıq maǵlıwmatlar berildi.

Sonday-aq, ilimiy hám dóretiwshilik jumıslarda plagiattıń aldın alıw, paydalanılǵan dáreklerge durıs silteme beriw, citata keltiriw qaǵıydalarına ámel etiw hám student-jaslar arasında akademiyalıq hadallıq mádeniyatın qáliplestiriw máseleleri hár tárepleme dodalandı.

Ilajdıń soraw-juwap bóliminde qatnasıwshılar ózlerin qızıqtırǵan sorawlarǵa qánigelerden juwap aldı. Atap aytqanda, siyrek ushırasatuǵın kitaplardı sanlastırıw procesinde avtorlıq huqıqına ámel etiw, antiplagiat baǵdarlamalarınan paydalanıwdıń huqıqıy tárepleri hám avtorlıq huqıqınıń ámel etiw múddetleri boyınsha túsinikler berildi.

Bul seminar-trening kitapxana xızmetkerleriniń huqıqıy sawatlılıǵın arttırıw, intellektuallıq múlkke húrmet penen qatnasta bolıw, ilimiy jumısta plagiattıń aldın alıw hám bilimlendiriw ortalıǵında akademiyalıq hadallıq principlerin bekkemlewge xızmet etti.

NMPI baspasóz xızmeti.