Rossiya Federaciyası Tatarstan Respublikası Qazan federal universitetinde filologiya ilimleriniń doktorı, akademik D.G.Tumashevanıń 100 jıllıǵına baǵıshlanǵan «Tumasheva oqıwları: Házirgi túrkiy til bilimi máseleleri hám perspektivaları» atamasındaǵı xalıqaralıq ilimiy konferenciya bolıp ótti.

Konferenciyaǵa Ájiniyaz atındaǵı Nókis mámleketlik pedagogikalıq institutı qaraqalpaq tili kafedrasınıń professorı Alima Pirniyazova, inglis tili kafedrasınıń professorı Gúlzira Qıdırbaeva óz bayanatları menen qatnasıp qayttı.

Nókis mámleketlik pedagogikalıq institutı hám Qazan federal universiteti shártnama tiykarında birneshe jıllardan berli qánigelikti arttırıw, professor-oqıtıwshılardıń tájiriybe almasıwı baǵdarında birge islesip kelmekte.

Qazan lingvistikalıq mektebi til bilimi baǵdarında XIX ásirden berli úlken tájiriybege iye. Jáhán til biliminde óz ornına iye bul mekteptiń tiykarın belgili tilshi ilimpazlar I.A.Boduen de Kurtene, N.V.Krushevskiy, V.A.Bogorodickiy, A.I.Anastasiev, N.S.Kukuranov, A.A.Carevskiy, A.I.Aleksandrov, S.K.Bulich hám V.V.Radlov salǵan.

Konferenciyaǵa dúnyadaǵı túrkiy mámleketlerinen, Rossiyanıń túrkiy tilles regionlarınan wákiller qatnastı.