Ájiniyaz atındaǵı Nókis mámleketlik pedagogikalıq institutında Pedagogika-psixologiya hám dóretiwshilik tálim fakulteti dene tárbiya hám sport kafedrası professorı, ádiwli ustaz Dúysenbay Karimovtıń 60 jıllıǵına arnalǵan yubiley keshesi bolıp ótti.

Ilajǵa elimizdiń dene tárbiya hám sport tarawında jumıs alıp barıp atırǵan belgili ustaz trenerler, institut rektoratı hám fakultetleriniń wákilleri, joqarı oqıw orınlarınıń professor-oqıtıwshıları, yubiley iyesiniń jaqınları, shákirtleri, sonday-aq, student-jaslar qatnastı.

Keshede instituttıń dene tárbiya hám sport kafedrası baslıǵı, professor Asqar Niyazov yubiley iyesiniń ómiri, ilimiy-pedagogikalıq hám tálim-tárbiya tarawında ámelge asırıp atırǵan jumısları haqqında maǵlıwmat berdi.

Dúysenbay Karimov 1966-jıl 14-oktyabrde Xojeli rayonında dúnyaǵa kelgen. 1992-jılı Nókis mámleketlik pedagogikalıq institutı Dene tárbiyası fakultetin tabıslı tamamlap, usı jerde sport pánleri teoriyası hám ámeliyatı kafedrasında stajyor-oqıtıwshı sıpatında óz miynet jolın basladı. 34 jıllıq ilimiy-pedagogikalıq miynet jolı dawamında assistent-oqıtıwshı, fakultet dekanınıń orınbasarı, aǵa oqıtıwshı lawazımlarında jumıs islep, docent hám professor sıyaqlı ilimiy ataqlarǵa eristi.

Ol veteran sportshılar arasında ótkeriletuǵın respublikalıq jarıslarǵa qatnasıp, joqarı nátiyjelerdi qolǵa kirgizip kelmekte. Atap aytqanda, 2024-jılı aprel ayında sambo boyınsha Buxara qalasında ótkerilgen Ózbekstan chempionatında 1-orındı, sol jılı may ayında Qazaqstan Respublikasınıń Aqtaw qalasında bolıp ótken Aziya hám Okeaniya chempionatında 3-orındı, sonday-aq, Tájikstan Respublikasınıń Dushanbe qalasında ótkerilgen jáhán chempionatında 3-orındı iyeledi.

Ilimiy-pedagogikalıq jumısları sheńberinde kóplegen shákirtlerge ustazlıq etip, bakalavr pitkeriw qánigelik jumısları hám magistrlik dissertaciyalardı tayarlawǵa ilimiy basshılıq etti.

Dúysenbay Karimovtıń shákirtleri «Universiada», «Bes baslama olimpiadası», «Studentler ligası» hám basqa da respublikalıq jáne xalıqaralıq sport jarıslarında tennis, vorkaut, armrestling sıyaqlı sport túrleri boyınsha jeńimpazlar qatarınan orın alıp kelmekte.

Ol ilimpaz sıpatında respublikalıq hám xalıqaralıq kólemde ótkerilip atırǵan ilimiy-teoriyalıq konferenciyalarda óziniń bayanatları menen turaqlı qatnasıp, ilimiy jurnallarda maqalalar járiyaladı, sonday-aq, birneshe oqıw hám metodikalıq qollanbalardı baspadan shıǵardı.

Pidayı ustaz Dúysenbay Karimovtıń jaslar tálim-tárbiyası hám ilimiy-pedagogikalıq baǵdardaǵı xızmetleri múnásip bahalanıp, 2004-jılı Qaraqalpaqstan Respublikası xalıq bilimlendiriw aǵlası, 2024-jılı Qaraqalpaqstan Respublikası Joqarǵı Keńesi Prezidiumınıń qararı menen «Watan pidayısı» kókirek belgileri menen sıylıqlandı.

Yubiley keshesinde sózge shıqqanlar Dúysenbay Karimovtıń balalıq, jaslıq dáwirleri, miynet jolı dawamında ámelge asırǵan úlgili xızmetlerin eske alıp, oǵan iygilikli tileklerin bildirdi.

Ilaj juwmaǵında ustaz Dúysenbay Karimov shıǵıp sóylep, kórsetilip atırǵan itibar hám bildirilgen tilekler ushın bárshege minnetdarshılıq bildirdi.

NMPI baspasóz xızmeti.