Búgin, 6-noyabr kúni Ájiniyaz atındaǵı Nókis mámleketlik pedagogikalıq institutı sport sarayında joqarı oqıw orınları student qızları arasında «Bes baslama olimpiadası» sport jarısları sheńberinde voleybol boyınsha jarıstıń Qaraqalpaqstan Respublikalıq basqıshı bolıp ótti.

Jaslar arasında salamat turmıs tárizin keń úgit-násiyatlaw, olardıń sportqa bolǵan qızıǵıwshılıǵın arttırıw hám fizikalıq belsendiligin qollap-quwatlawǵa baǵdarlanǵan jarıs oǵada qızǵın gúreslerge bay boldı.

Jarıs dawamında joqarı oqıw orınları komandaları óz ara kúsh sınasıp, maydanda epshillik, shaqqanlıq, komandada islew hám joqarı sport sheberligin kórsete aldı. Ásirese, qatnasıwshılardıń hár bir upay ushın mawasasız gúresi, jeńiske bolǵan umtılısı hám komandalıq awızbirshiligi jarısqa kóterińki ruwx baǵıshladı.

Solay etip, jarıs juwmaǵında:

1-orın – Ájiniyaz atındaǵı Nókis mámleketlik pedagogikalıq institutı;

2-orın – Berdaq atındaǵı Qaraqalpaq mámleketlik universiteti;

3-orın – Nókis mámleketlik texnika universiteti komandalarına nesip etti.

Jeńimpaz komanda jarıstıń respublikalıq final basqıshına jollama aldı.

Jeńimpazlar hám sıylı orın iyeleri Qaraqalpaqstan Respublikası Sport ministrligi tárepinen sıylıqlandı.

Bunday sport ilajları jaslardıń fizikalıq salamatlıǵın bekkemlew, qábiletli hám úmitli sportshılardı anıqlaw, sonday-aq, joqarı oqıw orınları studentleri arasında doslıq qatnasıqların bekkemlewde úlken áhmiyetke iye bolıp tabıladı.

NMPI baspasóz xızmeti.