Ájiniyaz atındaǵı Nókis mámleketlik pedagogikalıq institutında jılıtıw máwsiminde student-jaslardıń qáwipsizligin támiyinlew, ayrıqsha jaǵdaylardıń aldın alıw hám hár qıylı kewilsiz jaǵdaylarǵa jol qoymaw maqsetinde profilaktikalıq ushırasıw shólkemlestirildi.

Onda Qaraqalpaqstan Respublikası Ayrıqsha jaǵdaylar basqarması baslıǵınıń orınbasarı B.Avazmetov hám tiyisli juwapkerler qatnasıp, student-jaslarǵa jılıtıw máwsiminde qáwipsizlik qaǵıydalarına qatań ámel etiw boyınsha hár tárepleme túsinikler berdi.

Ushırasıw dawamında, ásirese, záhárli gazden záhárleniwdiń aldın alıw, gaz hám jılıtıw úskenelerinen durıs paydalanıw, elektr úskenelerinen paydalanıwda qáwipsizlik talaplarına ámel etiw hám órt qáwipsizligi qaǵıydaları haqqında hár tárepleme maǵlıwmat berildi.

Shıǵıp sóylegenler, záhárli gazden zıyanlanıwǵa alıp keletuǵın faktorlar, onıń dáslepki belgileri, ayrıqsha jaǵdaylarda durıs háreket etiw tártibi hám operativ xızmetlerge múrájat etiw máselelerine ayrıqsha toqtap ótti.

Qánigeler tárepinen student-jaslarǵa kúndelikli turmısta qáwipsizlik qaǵıydalarına biypárwa bolmaw, jılıtıw hám elektr úskenelerinen paydalanıwda qıraǵılıqtı arttırıw, anıqlanǵan qáwipli jaǵdaylar haqqında juwapker xızmetkerlerge jedel túrse xabar beriw zárúr ekenligi atap ótildi.

Ushırasıw soraw-juwap hám óz ara pikir almasıw ruwxında ótip, student-jaslardıń ayrıqsha jaǵdaylarda durıs háreket etiw boyınsha bilim hám kónlikpelerin bekkemlewge xızmet etti.

NMPI baspasóz xızmeti.