Mámleketlik bayraq kúnine arnalǵan bayram keshesi bolıp ótti

Ájiniyaz atındaǵı Nókis mámleketlik pedagogikalıq institutında 18-noyabr – «Ózbekstan Respublikasınıń mámleketlik bayraǵı haqqında»ǵı Nızamınıń qabıl etilgen kúni hám bul sánege 35 jıl tolıwı múnásibeti menen «Bir Watan, bir el, bir bayraq!» atamasındaǵı bayram keshesi bolıp ótti.

Keshege Ózbekstan hám Qaraqalpaqstan Jazıwshılar awqamlarınıń aǵzası, shayır R.Otarbaev, instituttıń milliy ideya, ruwxıylıq tiykarları hám huqıq tálimi kafedrasınıń úlken oqıtıwshısı D.Bekimbetova, Nawayı atındaǵı mámleketlik stipendiya tańlawınıń jeńimpazı, institut magistrantı Q.Usanova, sonday-aq, fakultetler dekanatınıń wákilleri, professor-oqıtıwshılar, tyutorlar hám studentler qatnastı.

Bayram keshesin instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ilajda sózge shıqqanlar tárepinen atap ótilgenindey, mámleketlik bayraq ózinde pútkil Ózbekstan xalqınıń ázeliy tilek-umtılısları, erk-ıqrarı, xalqımızǵa tán miymandoslıqtı sáwlelendirgen. Mámleketlik bayraqtıń mámleketlik mákeme hám shólkemler, oqıw orınları, Ózbekstan aǵzası bolǵan xalıqaralıq shólkemler, sırt ellerdegi elshixana hám turaqlı wákilxanalardıń aldında jelbirep turıwı, hár qıylı bayram saltanatlarında, mámleketimiz wákilleri qatnasıp atırǵan xalıqaralıq kólemdegi siyasiy, mádeniy-aǵartıwshılıq ilajlarda, abıraylı sport jarıslarında watanımızdıń abıroy-mártebesi, xalqımızdıń maqtanıshın ayqın sáwlelendirip, kewillerdi tolqınlandıradı.

Bayram keshesi talantlı studentler hám «Tumaris» xalıq ansambli aǵzaları atqarıwındaǵı koncert baǵdarlaması menen dawam etti.

NMPI baspasóz xızmeti.