Dean of the faculty:	Reymov Qarjawbay Dawletbaevich
	phone:	+998913752979
	e-mail:	nkspi_info@edu.uz
	veb-site:	xim-bio.ndpi.uz

Tálim baǵdarları

1. 5110300 – Ximiya
2. 5110400 – Biologiya

Fakultet kafedraları

1. Ximiya oqıtıw metodikası kafedrası
2. Botanika, ekologiya hám onı oqıtıw metodikası kafedrası
3. Zoologiya adam morfofiziologiyası hám onı oqıtıw metodikası  kafedrası 

Fakultettiń dáslepki tırnaǵı oqıtıwshılar  institutında 1943-jıldıń sentyabrinen fizika-matematika kafedrası quramında is baslaǵan Tábiyattanıw-geografiya bólimi tiykarında salınıp, ol 1948-jılı fakultetke aylandırıldı. Usı fakultettiń birinshi dekanı ximik úlken oqıtıwshı A.Bóleshov boldı. 1959-jılı x.i.k. Pak Yakov fakultet dekanı bolıp tastıyıqlandı.  Bunnan keyingi  1960-1965- jıllar aralıǵında fakultetke prof. S.Erejepov, 1967-1968-jılları A.Tleubergenov, 1969-1986-jılları dots. Q.Aytbaevlar dekan lawazımında basshılıq etti.

            Elimiz ǵárezsizlikke eriskennen keyin Respublikada mektep muǵallimlerin tayarlawdı jetilistiriw maqsetinde 1990-1991-oqıw jılında Nókis mámleketlik pedagogikalıq institutınıń qayta tikleniwi menen bul fakultet tábiyattanıw atı menen 1996-jılı 5-sentyabrde qayta shólkemlestirildi hám dekan lawazımında 1996-1998-jılları prof. B.Allamuratov, 1998-2002-jılları dots. Sh.Saparov, 2003-2010 jılları dots. Sh.Allamuratov, 2010-2021 jılları dots. A.Saparov, al 2021 jıldıń mart ayınan baslap dots. Q.Reymov basshılıq etpekte.

            Fakultet respublikamız hám qońsıslas wálayatlardıń mektep hámde liceyleri ushın ximiya, biologiya sahaları boyınsha pán muǵallimlerin jetistiretuǵın 5110300 – «Ximiya», 5110400 – «Biologiya» bakalavr tálim baǵdarları hám 5A110301-Anıq hám tábiyiy pánlerdi oqıtıw metodikası (Ximiya), 5A110401-Anıq hám tábiyiy pánlerdi oqıtıw metodikası (biologiya)  qániygelikleri boyınsha  magistratura dárejesindegi qánige oqıtıwshılardı tayarlamaqta. Olar pitkergennen keyin respublikanıń oqıw hám tálim-tárbiya mekemelerine  kelisilgen óz-ara shártnamalar tiykarında jumısqa tolıq ornalaspaqta.

Talabalar kontingenti respublikanıń xalıq sanı talabına baylanıslı jıldan-jılǵa  kóbeymekte. Házirgi kúnde fakultette  866 talaba bakalavr tálim baǵdarı (5110300-Ximiya  bakalavr tálim baǵdarında 383 talaba, 5110400-Biologiya bakalavr tálim baǵdarında 483 talaba,) boyınsha bilim aladı.  Olarǵa 15 mıńǵa shamalas atamadaǵı 145 mıńnan aslam nusqadaǵı qorǵa iye kitapxana, házirgi zaman texnik úskeneleri menen támiyinlengen, internet penen jalǵanǵan  elektron kitapxana hám auditoriyalar, pán kabineti hám laboratoriyalar paydalanıwında bolıp, talabalar biliminiń tereńlesiwine tiykar saladı. 

Ziyrek talabalarǵa  ilimiy dárejesi   joqarı, úlken  tájiriybege iye professor-oqıtıwshılar ustazlıq etedi. Usınıń menen birge pán aǵlası hám intalı talabalar ishinen  2018-2019-oqıw jılında  Biologiya oqıtıw metodikası qániygeligi 3-kurs talabası Nurmuxasheva Go`zzal hám 2019-2020-oqıw jılında  Ximiya oqıtıw metodikası qániygeligi 3-kurs talabası Qarajanova Shaxnozalar A.Nawayı atındaǵı mámleketlik stipendiya jeńimpazı boldı. Sonıń menen birge 2019-2020-oqıw jılında Biologiya oqıtıw metodikası qániygeligi 2-kurs talabaları Almenova Gúlbanıw İ.Yusupov atındaǵı stipendiyası jeńimpazı, Bekbergenova Gawhar Ájiniyaz atındaǵı stipendiya jeńimpazı, 2020-2021-oqıw jılında Biologiya oqıtıw metodikası qániygeligi 3-kurs talabası Dáwletbaeva Shaxnoza A.Nawayı atındaǵı mámleketlik stipendiya jeńimpazı, Biologiya oqıtıw metodikası qániygeligi 3-kurs talabası Qalbaeva Sarıgúl  İ.Yusupov atındaǵı stipendiyası jeńimpazı    boldı.

Házirgi kúnde fakultette “Ximiya oqıtıw metodikası”,  “Botanika, ekologiya hám onı oqıtıw metodikası ” hám “Zoologiya adam morfofiziologiyası  hám onı oqıtıw metodikası”  kafedraları bolıp, olarda 4 ilim doktorı, professor, 18 ilim kandidatı, dotsentler, 32 úlken  hám  assistent oqıtıwshılar bolıp, bakalavr talabaları hám magistrantlarına sabaq ótip, ilimiy-izertlew jumıslarına basshılıq etedi.

Búgingi kúnde fakultet quramındaǵı Ximiya oqıtıw metodikası kafedrasına  t.i.f.d.  dotsent L.Kabulova, Botanika, ekologiya hám onı oqıtıw metodikası kafedrasına b.i.k. dotsent R.Eshmuratov, Zoologiya adam morfofiziologiyası  hám onı oqıtıw metodikası  kafedrasına  b.i.f.d. dotsent            U. Kudaybergenovalar basshılıq etpekte .

         Fakultettiń professor-oqıtıwshı hám talaba jasları xalıq-aralıq, respublikalıq hám institut kóleminde ótkeriltuǵın ilimiy-ámeliy konferentsiyalarǵa jedel qatnaspaqta. Fakultette 2021-jılı 19-20 may sánelerinde «Tábiyiy pánlerdiń aktual máseleleri» atamasındaǵı II-xalıq aralıq ilimiy-teoriyalıq konferentsiyası ótkerildi. Bul konferentsiyalarǵa respublikamız JOO larınan, ÓzRİA ilimiy izertlew institutlarınan, orta arnawlı bilim beriw mekemelerinen professor-oqıtıwshılar, ilimiy xızmetkerler, magistrant hám studentler qatnastı.

Fakultet kafedraları tárepinen Óz.RİA QQ bóliminiń Tábiyat ilimleriniń birlesken, Bioekologiya hám Mikrobiologiya İnstitutları, Botanika baǵı, Tábiyattı qorǵaw komitetileri menen birgelikte birge islesiw  shártnamaları dúzilgen bolıp, bul talabalardıń laboratoriya sabaqların ótiwde, qánigelik hám pedagogikalıq ámeliyatların alıp barıwda úlken járdemlerin bermekte.