Búgin, 6-noyabr kúni Tashkent qalasında Ózbekstan Respublikası Prezidentiniń óz lawazımına kirisiwine arnalǵan saltanatlı ilaj bolıp ótti.

Ilajǵa Oliy Majlis Senatı aǵzaları hám Nızamshılıq palatasınıń deputatları, mámleketlik hám jámiyetlik shólkemlerdiń basshıları, diplomatiyalıq korpus wákilleri, jergilikli hám sırt elli ǵalaba xabar quralları xızmetkerleri qatnastı.

Ilajdı Ózbekstan Respublikası Oraylıq saylaw komissiyasınıń baslıǵı Z.Nizamxodjaev ashtı. Ol 24-oktyabr kúni bolıp ótken Prezident saylawı demokratiyalıq principler tiykarında, belsendi siyasiy báseki ortalıǵında ótkenligin atap ótti. Isbilermenler háreketi – Ózbekstan Liberal-demokratiyalıq partiyasınan talaban Shavkat Miromonovich Mirziyoev saylawshılardıń 80,12 procent dawısı menen Ózbekstan Respublikası Prezidenti etip saylanǵanın atap ótti.

Oraylıq saylaw komissiyasınıń baslıǵı qatnasıwshılar atınan Shavkat Mirziyoevti qutlıqladı hám oǵan Ózbekstan Respublikası Prezidenti gúwalıǵın tapsırdı.

Prezident Ózbekstan Respublikası Konstituciyasınıń 92-statyasına muwapıq, ant qabıl etti:

«Ózbekstan xalqına sadıqlıq penen xızmet etiwge, respublikanıń Konstituciyası hám nızamlarına qatań ámel etiwge, puqaralardıń huqıqları hám erkinliklerine kepillik beriwge, Ózbekstan Respublikası Prezidenti minnetlemesine júkletilgen wazıypalardı hújdanım menen atqarıwǵa saltanatlı túrde ant beremen», – dedi Shavkat Mirziyoev.

Ózbekstan Respublikasınıń mámleketlik gimni jańladı.

Bunnan soń Ózbekstan Respublikası Prezidenti Shavkat Mirziyoev aldaǵı bes jılǵa arnalǵan baslı baǵdarlar haqqında shıǵıp sóyledi.

Qaraqalpaqstan xabar agentligi.