Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasındaǵı barlıq joqarı oqıw orınlarınıń jaslar máseleleri hám ruwxıy-aǵartıwshılıq jumısları boyınsha tiyisli juwapkerleri qatnasıwında ótkerilgen seminar usı atamada shólkemlestirildi.

Ilaj institut studentleriniń respublikalıq hám xalıqaralıq tańlawlar, sport jarısları, pán olimpiadalarında qolǵa kirgizgen tabısları, qol miyneti úlgileri, súwretlew óneri baǵdarında jaslardıń dóretiwshilik jumıslarınıń kórgizbesi menen baslandı.

Seminarda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, rektordıń hayal-qızlar máseleleri boyınsha másláhátshisi Sayyora Bekchanova, profilaktikalıq inspektor, kapitan Bahadır Masharipov, Fizika-matematika fakulteti dekanınıń orınbasarı Xalmurat Esemuratov, jaslar awqamı jetekshisi Bayram Gúlimbetovlar institutta jaslar tálim-tárbiyası máseleleri boyınsha ámelge asırılıp atırǵan jumıslarǵa keń túrde toqtalıp ótti.

Jaslar tárbiyası hár qanday dáwirdiń oǵada áhmiyetli máselesi bolıp kelgen. Jaslarda mánawiyattı qáliplestiretuǵın tiykarǵı faktor – bul tálim-tárbiya sisteması bolıp esaplanadı. Ilim hám aǵartıwshılıqqa, tálim-tárbiyaǵa insandı jetiklikke baǵdarlaytuǵın, millet rawajlanıwınıń baslı shárti dep qarawımız kerek. Sonlıqtan da, jaslar tárbiyasına ǵárezsizligimizdiń dáslepki jıllarınan baslap dıqqat awdarılıp, fizikalıq jaqtan salamat hám ruwxıy jetik nawqıran áwladtı tárbiyalaw tiykarǵı wazıypa etip belgilendi hám mámleketlik siyasat dárejesine kóterildi.

Búgingi kúnde Ájiniyaz atındaǵı Nókis mámleketlik pedagogikalıq institutında 18 mıńnan aslam student-jaslar bilim almaqta. Jaslar tárbiyası máseleleri menen tikkeley jumıs alıp barıw jaslar menen islesiw, ruwxıy-aǵartıwshılıq bólimi, dekan orınbasarları, málimleme-resurs orayı, social-gumanitar baǵdarlardaǵı kafedralar, sonday-aq, jaslar awqamı, hayal-qızlar keńesi, sport klubı hám studentler keńesi sıyaqlı jámiyetlik shólkemler, jaslardıń baslamaların, qábiletlerin júzege shıǵarıw orayları jáne profilaktikalıq inspektorlar, tyutorlar, pedagog-tárbiyashılar hám institut psixologlarınan ibarat úlken jámááttiń tiykarǵı wazıypalarına kirgizilgen.

Bul baǵdardaǵı jumıslardıń usınday sistemalı jolǵa qoyılıwı institut student-jaslarınıń ilim, bilimlendiriw, kórkem óner, mádeniyat, sport hám basqa da baǵdarlarda joqarı nátiyjelerge erisiwine tiykar bolmaqta.

Ásirese, bunıń ishinde ayrıqsha atap ótiwimiz zárúr bolǵan studentler keńesi Ózbekstandaǵı barlıq joqarı oqıw orınları arasında dáslepki jolǵa qoyılǵan, jaslar menen islesiwdegi ózgeshe hám nátiyjeli strukturaǵa aylandı.

2019-jıldan berli qábiletli, ziyrek studentlerdi anıqlaw, olardı hár tárepleme qollap-quwatlaw maqsetinde jumıs alıp barıp atırǵan bul sistema hár bir fakultetten oqıwda hám jámiyetlik jumıslarda belsendilik kórsetip kiyatırǵan jaslardı qamtıp alıwda úlken tájiriybe topladı. Jaslardıń baslamaların ámeliyatqa keń engiziw hám jaslardı xoshametlew maqsetinde pútkilley jańasha sistema – studentlerge bazalıq stipendiyanıń 50% ine shekemgi muǵdarda ústeme haqı tólew ámeliyatqa engizilip, bir ǵana 2022-2023-oqıw jılı dawamında bunday imkaniyattan 1500 ge shamalas studentler nátiyjeli paydalanbaqta.

Sociallıq qorǵawǵa mútáj bolǵan studentlerden 304 jastıń bir jıllıq tólemli kontrakt pulları ministrlik, sonday-aq, Qaraqalpaqstan Respublikası Joqarǵı Keńesi, Jaslar isleri agentligi hám instituttıń óz qarjıları esabınan tólep berildi.

Sonıń menen birge, ijarada jasaytuǵın studentlerdiń ijara tólemlerin tólep beriw boyınsha úlgili jumıslar alıp barılıp, atap aytqanda, 2021-2022-oqıw jılında 1200 den aslam, al bıyılǵı oqıw jılında 1500 den aslam studentlerge ijara tólemleri tólendi.

Seminarda bayanatshılar tárepinen jaslardıń bos waqıtların nátiyjeli shólkemlestiriw, olar arasında jınayatshılıq hám huqıqbuzarlıqlardıń aldın alıw, Prezidentimiz tárepinen alǵa súrilgen bes baslama sheńberinde alıp barılıp atırǵan jumıslardı ele de kóbeytiw, hayal-qızlar menen islesiwdegi jańasha mexanizmler haqqında usınıslar bildirildi.

Ilajda Qaraqalpaqstan Respublikası Ministrler Keńesi Baslıǵınıń jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı Abatbay Dániyarov sózge shıǵıp, jaslar tálim-tárbiyası máselesinde ámelge asırılıp atırǵan jumıslarǵa joqarı baha berdi.

Sonday-aq, barlıq joqarı oqıw orınları ministrlikler, mákeme, kárxana hám shólkemler menen usı másele boyınsha tıǵız birge islesiwin jolǵa qoyıw, joqarı oqıw orınları arasında birge islesiwdiń nátiyjeliligin arttırıw boyınsha usınısların bildirdi. Institutta jumıs alıp barıp atırǵan studentler keńesi sıyaqlı sistemalardı basqa joqarı oqıw orınlarında da shólkemlestiriwdi usınıs etti.

Seminar óz ara pikir almasıwlar menen dawam etti.

NMPI baspasóz xızmeti.