Amerika Qurama Shtatlarınıń Tashkent qalasındaǵı Elshixanası Aymaqlıq inglis tili bóliminiń (The Regional English language Office – RELO) baslıǵı Kevin MakKoy hám «The Access Microscholarship program» baǵdarlaması boyınsha koordinator járdemshisi Umida Boltaeva Ájiniyaz atındaǵı Nókis mámleketlik pedagogikalıq institutına keldi.

Búgingi kúnde institutta AQSh Elshixanasınıń «ACCESS» baǵdarlaması sheńberinde 2022-2024-jıllarǵa mólsherlengen «English Access Microscholarship Program – STEM» grantı tiykarında ulıwma bilim beriw mektepleriniń 8-9-klass oqıwshıları ushın inglis tilin úyretiw boyınsha jumıslar alıp barılmaqta.

Institutta 2016-jıldan berli «ACCESS» baǵdarlaması tiykarında turaqlı dawam etip atırǵan joybardıń tórtinshi dáwiri sheńberinde ámelge asırılıp atırǵan jumıslar kelgen miymanlarda úlken qızıǵıwshılıq oyattı.

Olar mektep oqıwshılarına ótilip atırǵan sabaq processleri menen tanısıp, joqarı bahaların berdi.

Sonday-aq, instituttıń ilimiy isler hám innovaciyalar boyınsha prorektorı Nargiza Babaniyazova menen ushırasıp, birgelikte alıp barılıp atırǵan jumıslardıń barısı, professor-oqıtıwshılardıń qánigeligin jetilistiriw imkaniyatları haqqında sáwbetlesti.

Mırza Kevin MakKoy basshılıǵında mektep oqıwshıları qatnasıwında inglis tilin úyretiw boyınsha kórgizbeli metodologiyalıq seminar shólkemlestirildi.

Sonıń menen birge, miymanlar oqıwshılar menen sáwbetlesip, olardıń inglis tilin ózlestiriw dárejesi, sabaq processleri haqqındaǵı pikirleri menen tanıstı.

NMPI baspasóz xızmeti.