Paytaxtımız Nókis qalasında jaylasqan Sawda-sanaat palatası basqarmasınıń májilisler zalında Qaraqalpaqstan Respublikası Joqarǵı Keńesi hám Ministrler Keńesi, Joqarı bilimlendiriw, ilim hám innovaciyalar ministrligi shólkemlestiriwinde xalıqaralıq hám jergilikli grant joybarlarına qatnasıw boyınsha oqıw-seminarı bolıp ótti.

Ilajǵa respublikamızdaǵı joqarı oqıw orınları, sonday-aq, qala hám rayonlardaǵı ilimiy-pedagogikalıq, óndirislik baǵdarlardıń juwapker qánigeleri qatnastı.

Oqıw-seminarınıń ashılıw májilisinde Joqarǵı Keńes Baslıǵınıń orınbasarı R.Saparbaev, komitet baslıǵı T.Romanov, Ministrler Keńesi Baslıǵınıń orınbasarı B.Otemuratov, Joqarı bilimlendiriw, ilim hám innovaciyalar ministri B.Qayıpbergenovlar sózge shıǵıp, grant joybarlarınıń tarawlardı rawajlandırıwdaǵı áhmiyeti haqqında aytıp ótti.

Eki kún dawam etken oqıw-seminarında lektorlar tárepinen densawlıqtı saqlaw, bilimlendiriw, sociallıq sala, sport, ilim, turizm, mádeniyat, kórkem óner, awıl, toǵay hám suw xojalıǵı, energetika, ekologiya, informaciyalıq texnologiyalar, sanaat, ekonomikanı, isbilermenlikti rawajlandırıw sıyaqlı tarawlarda grant joybarlarına qatnasıw boyınsha qatnasıwshılarǵa ámeliy kónlikpeler berildi.

Qaraqalpaqstan Respublikası Joqarı bilimlendiriw, ilim hám innovaciyalar ministrliginiń málimleme xızmeti.