Ajiniyoz nomidagi Nukus davlat pedagogika institutida bitiruvchi kurs talabalarining bandligini ta’minlash va ularning tadbirkorlik tashabbuslarini qo‘llab-quvvatlashga qaratilgan “Kelajakka qadam” dasturi doirasida navbatdagi seminar-trening tashkil etildi.

Tadbirda “O‘zmilliybank” aksiyadorlik jamiyati Qoraqalpog‘iston Respublikasi bo‘yicha filiali mutaxassisi Klara Sharipova, Oliy Majlis Qonunchilik palatasi huzuridagi Yoshlar parlamenti yoshlar tadbirkorligi, raqobatni rivojlantirish va sanoat masalalari qo‘mitasi raisi, “RBG Company” kompaniyasi asoschisi, tadbirkor Babur Rajabov, institutning “Kelajakka qadam” markazi mas’ullari, bitiruvchi kurs talabalari ishtirok etdi.

Seminarning asosiy maqsadi – bitiruvchi yoshlarni mehnat bozoriga tayyorlash, ularning kasbiy ko‘nikmalarini mustahkamlash, ishga joylashish jarayonida zarur bo‘ladigan bilim va ko‘nikmalarni shakllantirish hamda tadbirkorlik faoliyatini boshlashga ko‘maklashishdan iborat.

Seminar-trening davomida mutaxassislar tomonidan mehnat bozorida talab yuqori bo‘lgan kasb va yo‘nalishlar, biznes reja ishlab chiqish asoslari, startap loyihalarni yo‘lga qo‘yish va moliyalashtirish imkoniyatlari, imtiyozli kreditlar va davlat dasturlari haqida batafsil ma’lumotlar berildi.

NukusDPI matbuot xizmati.