Ájiniyaz atındaǵı Nókis mámleketlik pedagogikalıq institutında «Piyshembi – jaslar kúni» múnásibeti menen Qaraqalpaqstan Respublikası Ministrler Keńesi Baslıǵınıń Qarjı, ekonomika hám kámbaǵallıqtı qısqartıw máseleleri boyınsha birinshi orınbasarı – Qaraqalpaqstan Respublikası Ekonomika hám qarjı ministri Atamurat Shamuratovtıń belsendi student-jaslar menen ushırasıwı bolıp ótti.

Ushırasıw dawamında aymaqta ámelge asırılıp atırǵan joybarlar, jaslardıń bántligin támiyinlew, olardıń biznes baslamaların qollap-quwatlaw, startap joybarların qarjılandırıw mexanizmleri haqqında tolıq maǵlıwmat berildi.

Sonday-aq, jaslar ushın jaratılıp atırǵan jeńillikler, kredit hám grant imkaniyatları jáne kásip-óner iyelewdiń áhmiyeti ayrıqsha atap ótildi.

Ilaj dawamında jaslar óz baslamaları haqqında aytıp ótip, sorawlarına juwaplar aldı.

NMPI baspasóz xızmeti.