Ájiniyaz atındaǵı Nókis mámleketlik pedagogikalıq institutında student-jaslardıń jazǵı demalıs waqıtların mazmunlı ótkeriw maqsetinde «Áhmiyetli 90 kún» ilajları sheńberinde «Meniń Ózbekstanım» hám «Men súygen shıǵarma» atamasındaǵı videorolikler tańlawı shólkemlestirilmekte.

Tańlaw eki basqıshta:

– Birinshi basqısh usı jıldıń 30-iyul kúnine shekem fakultetler kóleminde;
– Ekinshi basqısh usı jıldıń 1-10-avgust kúnleri aralıǵında institut kóleminde ótkeriledi.

Tańlawǵa institutta oqıp atırǵan barlıq studentler qatnasıwı múmkin.

Studentlerdiń dóretiwshilik jumısları usı jıldıń 25-iyul kúnine shekem (sol kúni de) fakultet dekanlarınıń jaslar menen islesiw, ruwxıylıq hám aǵartıwshılıq isleri boyınsha orınbasarı tárepinen qabıllanadı.

Tańlawǵa kelip túsken dóretiwshilik jumıslar fakultetlerde shólkemlestirilgen Jumısshı topar tárepinen saylap alınadı hám jeńimpaz dep tabılǵan jumıslar instituttıń jaslar menen islesiw, ruwxıylıq hám aǵartıwshılıq bólimine usınıladı.

Institut basqıshına usınıs etilgen videorolikler Jumısshı topar aǵzaları tárepinen kórip shıǵıladı hám jeńimpazlar anıqlanadı.

Tańlawdıń institut basqıshında 1-, 2- hám 3-orınlardı iyelegen qatnasıwshılar rektorat tárepinen diplom hám estelik sawǵaları menen sıylıqlanadı.

Qosımsha maǵlıwmatlardı fakultet dekanlarınıń jaslar menen islesiw, ruwxıylıq hám aǵartıwshılıq isleri boyınsha orınbasarlarınan alıwıńız múmkin.

NMPI baspasóz xızmeti.