Кеча, 22 ноябрь куни Тошкент шаҳридаги «Халқлар дўстлиги» саройида «Қувноқлар ва зукколар: чемпионлар кубоги-2020» бўлиб ўтди.

Бу йилги танловнинг финал босқичида «Қувноқлар ва зукколар» республика танловининг 2015 йилги чемпиони Нукус давлат педагогика институтининг «Турон», 2016 йилги мавсум чемпиони Андижон қишлоқ хўжалиги ва агротехнологиялар институтининг «Оғалар», 2017 йил чемпиони Навоий давлат кончилик институтининг «ТБТ», 2018 йил чемпиони Тошкент молия институтининг «Молиячи», 2019 йилги мавсум чемпиони Тошкент давлат аграр университетининг «Янги юлдузлар» жамоалари иштирок этиб, энг сара бадиий ва кўнгилочар дастурларини йиғилганлар эътиборига ҳавола этди.

Танлов якунларига кўра, Нукус давлат педагогика институтининг «Турон» жамоаси ғолиб деб топилди ва 2020 йилги Ўзбекистон чемпиони сифатида супер кубок эгаси бўлди. Ғолиб жамоага 30 миллион сумлик сертификат топширилди.

Маълумот учун, Нукус давлат педагогика институтининг «Турон» жамоаси «Қувноқлар ва зукколар» республика танловининг 2015 йилги чемпиони бўлган ва 2018 йилги мавсумда 2-ўринни эгаллаган эди.

Нукус ДПИ матбуот хизмати