Mamlakatimizdagi birinchi oliy ta’lim muassasasi sifatida ta’lim va xalq xo‘jaligining turli sohalariga yuqori salohiyatli malakali mutaxassislarni tarbiyalab chiqarayotgan Ajiniyoz nomidagi Nukus davlat pedagogika instituti jamoasi uchun yakunlanayotgan 2025-yil ulkan muvaffaqiyatlarga to‘la yil bo‘ldi.

Institutda yil davomida alohida faollik ko‘rsatib, yuqori natijalarga erishgan professor-o‘qituvchilar, mutaxassis xodimlar va talaba-yoshlarni rag‘batlantirish, ularning mehnatlarini munosib baholash maqsadida taqdirlash marosimi bo‘lib o‘tdi.

Tadbirda institut rektori Alisher Ubbiyev so‘zga chiqib, eshik qoqib turgan yangi 2026-yil bilan yig‘ilganlarni tabrikladi. Yakunlanayotgan 2025-yilda institutda o‘quv jarayonini takomillashtirish, ilmiy-tadqiqot ishlarini rivojlantirish, yoshlar bilan ishlash, ma’naviy-ma’rifiy yo‘nalishdagi tadbirlarni tizimli tashkil etish bo‘yicha amalga oshirilgan ishlar hamda erishilgan natijalarga to‘xtaldi.

Albatta, bunday natijalarga erishishda mamlakatimizda oliy ta’limga qaratilayotgan e’tibor, yaratilgan sharoitlar hamda har tomonlama qo‘llab-quvvatlashning ahamiyati katta ekani ta’kidlandi.

Tadbirda yil davomida ilmiy-pedagogik sohada yuqori natijalarga erishgan bir guruh professor-o‘qituvchilar, xodimlar hamda talaba-yoshlar turli nominatsiyalar bo‘yicha taqdirlandi.

Shu bilan birga, “Eng faol yil talabasi” tanlovining institut bosqichi g‘oliblariga diplomlar topshirildi.

Taqdirlash marosimi “To‘maris” xalq ansambli, musiqa ta’limi kafedrasi professor-o‘qituvchilari va iqtidorli talabalar ijrosidagi bayram konserti bilan davom etdi.

Institutda yangi yil bayrami tadbirlari davom etmoqda.

NukusDPI matbuot xizmati.