Халқ таълими вазирлиги ва Британия Кенгашининг Ўзбекистондаги ваколатхонаси халқ таълими тизимида инглиз тилини ўқитишда ислоҳотларга тайёргарлик кўрмоқда, дея хабар бермоқда Gazeta.uz.

Ислоҳотлардан кўзланган мақсад, ўқув режалари, тест олиш/баҳолаш, методология ва материаллар орқали таълим сифатини янада яхшилаш, ўқитувчилар меҳнат самарадорлигини ошириш учун шарт-шароитлар яратишдан иборат.

3-12 ноябрь кунлари Тошкентда халқ таълими тизимида инглиз тили ўқитилишида ислоҳотларни қўллаб-қувватлаш бўйича янги миллий жамоасининг йиғилиши бўлиб ўтмоқда. Ўқитувчилар, тренерлар ва Британия Кенгаши мутахассисларидан иборат жамоа ўқитишни ислоҳ қилиш бўйича муҳим тавсияларни ишлаб чиқиши лозим.

Жамоани Британиянинг мактабларда инглиз тилини ўқитиш бўйича консультант, инглиз тили ўқитиш ва янги авлод дарсликларини яратиш бўйича 25 йиллик тажрибага эга Венди Арнольд қўллаб-қувватламоқда.

Консультант 2014 йилда Ўзбекистон мактабларида ўқитиш амалиётини ўрганиш якунлари бўйича ўз тавсияларини берганини эслатиб ўтди. Ўшанда у CEFR хорижий тилларни билиш даражасининг катталарга мўлжалланган версиясини, жумладан А1 даражасини бошланғич мактабларнинг 4-синф битирувчилари учун ўрнатилган таълим стандартидаги болаларга мўлжалланган даражага алмаштиришни тавсия қилган эди.

Шунингдек, Венди Арнольд 4-синфни тугатганда эмас, балки 6-синфни битирганда А1 даражага, 7-эмас, 9-синфни битиргарда А2 даражага эришиш ҳақиқатга яқинроқ деб ҳисоблайди.

Ўз таклифларини асослар экан, консультант ElliE (Early English Learning in Europe) лойиҳасини ўрганиш натижаларини айтиб ўтди. Унга кўра, Испания, Венгрия, Польша ва бошқа мамлакатларда бошланғич мактабларни тамомлаш бўйича ўртача А1 даражаси (фақатгина оғзаки нутқ ва эшитиш) намойиш этилиши, ўқувчилар кўплаб теледастурлар ва фильмлар томоша қилиш, синфдан ташқарида мулоқот қилиш имкониятига эга бўлган.

Венди Арнольд бошланғич синфлар ўқитувчилари мунтазам равишда Kids’ English ўқув комплекти ҳамда ўқитиш методологиясини ўрганиб бориши зарур эканлигини таъкидлади.

Миллий жамоа томонидан ишлаб чиқилган тавсиялар Халқ таълими вазирлигига тақдим этилади.