Ажиниёз номидаги Нукус давлат педагогика институти моддий манфаат эвазига ўзлари институтда ишламаса ҳам «ўқишга киритиб бераман, институтда ишлайдиган танишларим бор» деб, халқнинг ишончига кириб, алдаб юрган одамлардан эҳтиёт бўлишга, уларнинг ёлғон ваъдаларига  ишониб қолмасликка чақиради.

Бош прокуратура ҳузуридаги Иқтисодий жиноятларга қарши кураш департаменти Қорақалпоғистон Республикаси бошқармаси томонидан прокуратура ва Давлат хавфсизлик хизмати билан ҳамкорликда фуқароларнинг ишончига кириб, танишлари орқали институтнинг Элликқалъа педагогика факультети мактабгача таълим йўналишига 2 500 АҚШ доллари эвазига ўқишга киритиб беришни ваъда қилиб, шунинг 1 500 АҚШ долларини олаётган фуқаро С.М.ни ушлади.

Бу фуқаро ўзи институтда ишламаса ҳам институт номидан ноқонуний иш тутиб, охир-оқибат бугунгидек ҳолатга тушиб қолди.

Ҳурматли фуқаролар! Биз Ажиниёз номидаги Нукус давлат педагогика институтига ўқишга кириш фақат тегишли норматив-ҳуқуқий ҳужжатларда белгиланган тартибда ва муддатларда бўлиб ўтишини, бошқа ҳар қандай коррупцион усуллар ноқонуний ҳаракат эканлигини яна бир марта эслатиб ўтмоқчимиз. Институт номидан ноқонуний иш тутиб юрган фирибгарлардан эҳтиёт бўлишга чақириб қоламиз!

Ажиниёз номидаги Нукус давлат педагогика институти матбуот хизмати.