Аввал хабар қилинганидек, Ажиниёз номидаги Нукус давлат педагогика институтида Нукус шаҳридаги барча маҳалла фуқаролар йиғинларидаги уюшмаган ёшлар учун уч турдан иборат интеллектуал турнир ташкил этилди.

 

Бугун, 23 май куни мазкур турнирнинг якуний тури бўлиб ўтди.

 

Бугунги кунда мамлакатимизда уюшмаган ёшлар билан ишлаш, уларни касб-ҳунар ва билим олишга йўналтириш ҳукумат даражасида эътиборга олинган бўлиб, институт Нукус шаҳридаги ўндан зиёд маҳалла фуқаролар йиғинлари билан ушбу йўналишда тиғиз ҳамкорлик қилиб келмоқда.

Интеллектуал турнирнинг якуний тури олдидан институтнинг ёшлар билан ишлаш ва маънавий-маърифий ишлар бўйича проректори Қ.Қодиров сўзга чиқиб, амалга оширилаётган ишларнинг аҳамияти ҳамда самарасига алоҳида тўхталиб ўтди ва барча ёшларга омад тилади.

 

Ўтказилган турда Нукус шаҳридаги ўндан ортиқ маҳалла пуқаролар йиғинларидан жамоалар иштирок этиб, ўз билим ва кўникмалари, мантиқий тафаккур даражасини синовдан ўтказди.

 

Сўнгги турда мураккаблик даражаси ўртача бўлган 15 савол ўйналиб, уч тур натижасига кўра ғолиб ва совриндорлар аниқланди.

 

Шундай қилиб, 1-ўринни «Кўк ўзак» маҳалла фуқаролар йиғини ҳудудида истиқомат қилувчи уюшмаган ёшлардан иборат бўлган «Медалион» жамоаси эгаллади. Шунингдек, 2-ўрин «Қумбиз овул» ва «Жийдели Байсин», 3-ўрин эса «Наўпир», «Гўне қала» ва «Ҳаво йўллари» маҳалла фуқаролар йиғинларининг ёшларидан таркиб топган жамоаларга насиб этди. Ғолиб ва совриндорларга институт ректорининг фахрий ёрлиқлари ва тарихий Хива шаҳрига бепул саёҳат йўлланмаси берилди.

 

Шу билан бирга, турнирда фаол иштирок этган бошқа жамоалар ҳамда турнирни ташкиллаштириш ишларини олиб борган институтнинг тарих факультети деканати, кафедралари ва профессор-ўқитувчилари фахрий ёрлиқлар ва эсталик совғалари билан тақдирланди.

 

Тадбир институтнинг қобилиятли талабалари ижросидаги концерт дастури билан давом этди.

 

Институтда пойтахтимиздаги маҳаллаларда истиқомат қилувчи уюшмаган ёшлар учун мини футбол, волейбол, китобхонлик ишларини ўтказиш, қобилиятли ёшларни қўллаб-қувватлаш каби намунали ишлар давом этмоқда.

 

Ислам Матеков,

Нукус ДПИ матбуот котиби.

Қорақалпоғистон ахборот агентлиги.

Муаллиф олган расмлар.