Danıshpan xalqımız arasında «Ustaz – atańnan ullı» degen danalıq gáp bar. Shınında da, hár bir insannıń ata-anası perzentin dúnyaǵa alıp kelip, oǵan tárbiya berse, ustazdıń bergen úgitleri, bilimi hám tálim-tárbiyası onıń kámil, jetik insan bolıwına úlken úles qosadı.

Ájiniyaz atındaǵı Nókis mámleketlik pedagogikalıq institutı jámááti Ózbekstan Respublikası Joqarı hám orta arnawlı bilimlendiriw ministrligi janındaǵı Ruwxıylıq hám aǵartıwshılıq orayınıń direktorı Fozilbek Farhodov basshılıǵında institut professorı, pedagogika ilimleriniń doktorı, «Fidokorona xizmatlari uchun» ordeniniń iyesi, kóplegen shákirtlerdiń ádiwli ustazı, shayır Óserbay Álewovtıń halınan xabar aldı.

Miymanlar professor hám onıń shańaraq aǵzaların jaqında ǵana bolıp ótken Qurban hayıtı menen qutlıqlap, bekkem densawlıq, shańaraǵına amanlıq, ırısqı-nesiybe tiledi. Sonday-aq, iyul ayı baslarında elimizde bolıp ótken tınıshsız jaǵdaylar haqqında pikir bildirilip, tınıshlıqtıń qádirine jetiwimiz, onı kóz qarashıǵınday qásterlep saqlawımız zárúr ekenligi atap ótildi.

Ustazǵa ministrlik hám institut jámááti atınan minnetdarshılıq bildirilip, milliy shapan kiydirildi hám sawǵalar tapsırıldı.

Óz gezeginde, professor Óserbay Álewov usınday itibar hám húrmet ushın sheksiz minnetdarshılıǵın bildirip, óziniń qáleminen dóregen poeziyalıq toplamın kelgen miymanlarǵa sawǵa etti.

Institutta nuranıy ustazlardıń halınan xabar alıw ilajları dawam etpekte.

NMPI baspasóz xızmeti.