14-dekabr – Qaraqalpaqstan Respublikasınıń Mámleketlik bayraǵı qabıl etilgen kún. Bunnan 30 jıl aldın áyne usı sánede mámleketimizdiń rásmiy belgileriniń biri bolǵan Mámleketlik bayraǵımız haqqındaǵı nızam tastıyıqlanǵan edi.

Sáne múnásibeti menen Ájiniyaz atındaǵı Nókis mámleketlik pedagogikalıq institutında saltanatlı bayram ilajı bolıp ótti.

Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.

Saltanatlı ilajǵa professor-oqıtıwshılar, tyutorlar hám belsendi student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Onda instituttıń milliy ideya, ruwxıylıq tiykarları hám huqıq tálimi kafedrasınıń baslıǵı E.Tilewov, sonday-aq, usı kafedra docenti T.Qudaybergenovalar 1992-jıl 14-dekabr kúni Qaraqalpaqstan Respublikası Joqarǵı Keńesiniń XI sessiyasında qabıl etilgen «Qaraqalpaqstan Respublikasınıń Mámleketlik bayraǵı haqqında»ǵı nızamı hám onıń tariyxıy áhmiyeti jónindegi bayanatların jıynalǵanlar itibarına usındı.

Atap ótilgenindey, Qaraqalpaqstan Respublikasınıń Mámleketlik bayraǵı Qaraqalpaqstan Respublikasınıń suverenli mámleket ekenliginiń nıshanı esaplanadı.

Qaraqalpaqstan Respublikasınıń Mámleketlik bayraǵı aspan kók, toyǵın sarı hám jasıl reńlerden ibarat bolıp, ortasındaǵı sarı reńli bólek aq hám qızıl sızıqlar arqalı ajıralıp turadı.

Qaraqalpaqstan Respublikasınıń Mámleketlik bayraǵı Qaraqalpaqstan Respublikasınıń rásmiy wákilleriniń sırt elge saparlarında, xalıqaralıq ánjumanlarda, kórgizbelerde hám sport oyınları jarıslarında Qaraqalpaqstan Respublikasın dúnyaǵa tanıtadı. Qaraqalpaqstan Respublikasınıń mámleketlik bayraǵı xalıqaralıq maydanda basqa mámleketlerdiń bayraqları menen teń jelbirep turadı.

Ilaj student-jaslar, professor-oqıtıwshılar menen pikir almasıw tárizinde dawam etti.

Bayram múnásibeti menen instituttıń barlıq fakultetlerinde saltanatlı ilajlar ótkerildi.

NMPI baspasóz xızmeti.