Nepal paytaxtı Katmandu qalasında voleybol boyınsha hayal-qızlar arasında ótkerilip atırǵan Aziya Chellendj kubogi jarıslarında «B» toparında qatnasqan Ózbekstan saylandı komandası yarım final jollamasına iye boldı.

Shri-Lanka hám Maldiv saylandı komandaları menen bolıp ótken oyınlarda tolıq ústemlikke iye bolǵan voleybolshı qızlarımız 3-turda Qazaqstan komandasına imkaniyattı berip qoydı hám «B» toparında 2-orındı iyeledi.

Yarım finalda jerleslerimiz «A» toparınıń jeńimpazı Hindstan komandası menen oynaydı. Oyın 26-may kúni bolıp ótedi.

Esletip ótemiz, xalıqaralıq jarısqa sport veteranı Azat Kazakov bas trenerligindegi Ózbekstan saylandı komandası quramında Qaraqalpaqstan Respublikasınan – Ájiniyaz atındaǵı Nókis mámleketlik pedagogikalıq institutı studentleri Gúlmira Qulımbetova, Nadira Reyimbaeva, Gúlbazar Nuranova, Aziza Joldasbaevalar qatnaspaqta.

Komandamız aǵzalarına yarım final basqıshında áwmet tileymiz!

NMPI baspasóz xızmeti.